«Құрылтай сайлауы ең жоғары деңгейде ұйымдастырылған» - Тәжікстаннан келген халықаралық байқаушы

Бүгін, 2026 жылғы 23 тамызда, Қазақстанда Құрылтай депутаттарының алғашқы сайлауы өтіп жатыр. Дауыс беру барысын халықаралық байқаушылар да бақылауда, деп хабарлайды Zakon.kz.

Сайлау үдерісі туралы пікірін Тәжікстанның Орталық сайлау және референдум комиссиясының төрағасы Бахтиёр Худоёрзода білдірді.

Ол халықаралық байқауға қатысуға шақырғаны үшін Қазақстан тарапына алғыс айтып, қазіргі сайлау науқанының елде жүргізілген конституциялық реформалар аясындағы маңызын атап өтті.

"Биыл көктемде Қазақстанда конституциялық реформа жүргізілді. Ол сайлау жүйесіне де, елдің заң шығарушы билігіне де қатысты. Бұл Қазақстанда мемлекеттік институттарды дамыту бағытында жүйелі әрі жоспарлы жұмыс жүргізіліп жатқанын көрсетеді", – деді Бахтиёр Худоёрзода.

Халықаралық байқаушы дауыс беруді ұйымдастыру деңгейіне жоғары баға берді. Оның айтуынша, қажетті дайындық жұмыстары жүргізіліп, сайлаушыларға сайлау тәртібі туралы ақпарат берілген.

"Сайлаудың ең жоғары деңгейде ұйымдастырылғанын көріп отырмыз. Жоспарлы дайындық жүргізіліп, сайлаушыларға қажетті ақпарат берілген, сайлауды өткізуге қатысты барлық мәселе бойынша жұмыс ұйымдастырылған", – деді ол.

Бахтиёр Худоёрзода өзі барған сайлау учаскелеріндегі жағдайға да тоқталды. Оның айтуынша, учаскелік комиссиялар азаматтардың еркін таңдау жасауына қажетті жағдайдың бәрін қамтамасыз еткен.

"Біздің байқауымыз көрсеткендей, учаскелік комиссиялар сайлаушылардың өз еркін еркін білдіріп, өздері қалаған партияға дауыс беруі үшін барлық жағдайды жасаған", – деп атап өтті Тәжікстанның Орталық сайлау және референдум комиссиясының төрағасы.

Сурет: Zakon.kz

Байқаушының бағалауынша, өзі болған учаскелерде азаматтар сайлау құқығын еркін жүзеге асырып жатыр.

"Біздің байқауымыз азаматтардың өз еркін еркін білдіріп жатқанын көрсетті. Олардың конституциялық құқықтарын жүзеге асыруына қандай да бір кедергі барын байқап отырған жоқпыз", – деді Бахтиёр Худоёрзода.

Сөз соңында халықаралық байқаушы Қазақстанға одан әрі даму мен өркендеу тіледі.