Кезектен тыс парламент сайлауы өтеді деген сыбыс қаншалықты негізді

2025 жылғы 17 маусымда "Орталық Азия – Қытай" екінші саммитінің кулуарында Қазақстан премьер-министрінің бірінші орынбасары Роман Скляр "Күзде кезектен тыс параламент сайлауы өтеді" деген сыбысқа қатысты пікір білдірді, деп хабарлайды Zakon.kz.

Журналистер Склярдан күзде өтеді деген кезектен тыс сайлау туралы сыбыстың қаншалықты шындыққа жанасатынын нақтылап сұрады.

"Мен бұл сыбыстарды БАҚ беттерінен көріп, оқып жүрмін. Бірақ бұған ешқандай негізі жоқ. Парламенттік жүйе тұрақты жұмыс істеп жатыр және өзінің тиімділігін көрсетіп отыр деп толық сеніммен айта аламын. Жеке өз басым мұндай сайлау өткізуге ешқандай себеп көріп тұрған жоқпын", - деді Скляр.

Сондай-ақ, журналистер үкімет мүшелерінің демалысқа шығу жоспары бар-жоғын сұрады.

"Әзірше белгісіз. Барлығы жұмыс қарқынына байланысты болады. Егер шұғыл жұмыстар шықса, демалысқа шықпаймыз. Жалпы үкімет мүшелері өте сирек демалады. Демалысқа шықса да, өте қысқа мерзімге ғана, - деп қосты Роман Скляр.

Еске салайық, бұған дейін Роман Скляр қазақстандықтардың жеке деректерінің жаппай таралуы жөнінде пікір білдірген еді.