Кедендік шекара арқылы өткізу кезінде жеке пайдалануға арналған тауарлардың өлшемдерін өзгерту жоспарлануда

Қаржы министрлігі Кеден одағының кедендік шекарасы арқылы жеке тұлғалар өткізетін тауарларды жеке пайдалануға арналған тауарларға жатқызудың критерийлеріне өзгерістер жобасын дайындады, деп хабарлайды Zakon.kz.

Жоба "Қазақстан Республикасындағы кедендік реттеу туралы" Қазақстан Республикасы Кодексінің 560-бабының 3-тармағына сәйкес әзірленді.

Еуразиялық экономикалық одақтың кедендік аумағына кез келген тәсілмен иесімен бірге жөнелтілетін және иесімен бірге жөнелтілмейтін багажда жеке тұлғалар әкелетін тауарлардың сипаттамасы мен санына, сондай-ақ тауарларды өткізу жиілігіне байланысты, егер:

- төменде көрсетілген тауарлар бойынша Еуразиялық экономикалық одақтың кедендік шекарасы арқылы жеке тұлғаның тауарларды өткізу жиілігі жылына 1 (бір) реттен аспаса және саны мынадай көрсеткіштен аспаса:

• ЕАЭО СЭҚ ТН 4303 10 тауар позициясында жіктелетін теріден жасалған бұйымдар (оның ішінде бас киімдер) – бір адамға бір атаудағы, мөлшердегі және үлгідегі 1 (бір) зат;
• ұялы телефон – бір адамға 2 (екі) бірлік;
• планшет – бір адамға 2 (екі) бірлік;
• портативті алып жүретін компьютер және оған керек-жарақтар (ноутбук, нэтбук) – бір адамға 1 (бір) бірлік;
• зергерлік бұйымдар – бір адамға 5 (бес) зат;
• велосипед – бір адамға 1 (бір) дана;
• балалар арбасы – бір адамға 1 (бір) дана;

- өзге де тауарлар бойынша Еуразиялық экономикалық одақтың кедендік шекарасы арқылы жеке тұлғаның тауарларды өткізу жиілігі айына 1 (бір) реттен аспаса жеке пайдалануға арналған тауарларға жатады.

Еуразиялық экономикалық одақтың кедендік аумағына кез келген тәсілмен әкелінетін жеке пайдалануға арналған көлік құралдары, егер олардың саны жылына 1 (бір) бірліктен асса кәсiпкерлiк қызмет мақсатына арналған деп қарастырылады.

Көрсеткiштер бұрын пайдалануда болған тауарларға (жеке пайдалануға арналған көлік құралдарын қоспағанда) қатысты қолданылмайды.

Жоба 22 сәуірге дейін жария талқылау үшін "Ашық НҚА" порталында орналастырылған.