Қазақстанда қазан айы әдеттегіден қалай ерекшеленді: синоптиктер қорытынды жасады

"Қазгидромет" РМК синоптиктері 2026 жылғы қазан айының қорытындысын жариялады, деп хабарлайды Zakon.kz.

Метеорологтердің мәліметінше, биыл қазан айы Қазақстанның басым бөлігінде әдеттегіден жылы болды. Ел аумағының көп бөлігінде ауа температурасы климаттық нормадан 1-4°C жоғары тіркелді.

Тек Шығыс Қазақстан облысында, Абай облысының оңтүстігінде және оңтүстік-шығыстың жекелеген аудандарында ауа температурасы нормадан шамамен 2°C төмен болды.

Жауын-шашын мөлшері де өңірлерге қарай әртүрлі болды. Қазақстанның басым бөлігінде жауын-шашын климаттық нормадан аз түсті.

"Алайда солтүстік, солтүстік-шығыс, шығыс, оңтүстік және орталық өңірлердің басым бөлігінде, сондай-ақ оңтүстік-шығыстың жекелеген аудандарында жауын-шашын мөлшері нормадан 1,3-2,2 есе көп болды, – деп хабарлады "Қазгидромет" РМК баспасөз қызметі.