Қазақстан жасөспірімдер құрамасы әлем чемпионатында 5-орын үшін таласады

Түркияның Анталия қаласында өтіп жатқан жасөспірімдер арасында Дэвис кубогының (командалық әлем чемпионаты) финалдық кезеңінде Қазақстан құрамасы үздік бестікке ілігу үшін кортқа шығады, деп хабарлайды Zakon.kz.

Кеше қазақстандық жасөспірімдер ширек финалда Жапония командасына 0:2 есебімен жол берді. Жапониялықтар бұған дейін Дэвис кубогында екі рет, 2010 және 2019 жылдары жеңімпаз атанған болатын.

Бүгін Сергей Квактың шәкірттері Қытай Тайбэйін жеңді. Алдымен Дамир Жалғасбай Ванг Йен Чунды 6:0, 6:2 есебімен тізе бүктірді.

Екінші ойында Заңғар Нұрланұлы тамаша жеңіске қол жеткізді. Ол бірінші партияда Чен Куан Чоудан 3:5 есебімен ұтылып жатып, камбэк жасай алды – 7:6 (7:3). Екінші сетте қарсыласын 6:2 есебімен қапы қалдырды.

Осылайша, Қазақстан жасөспірімдері 16 қарашада Франция құрамасымен бесінші орын үшін таласады. Қазақстандықтар әлемнің төрт дүркін чемпионы – Францияны топтық бәсекеде жеңген еді.