Қазақстан мен Ресей теміржол көлігі мен автомобиль жолдарын бірге дамытатын болады

Үкімет 2024 жылғы 22 қарашада "ҚР Үкіметі мен РФ Үкіметі арасындағы теміржол көлігі мен инфрақұрылымды, автомобиль жолдарын, сондай-ақ мемлекеттік шекарадағы өткізу пункттерін дамыту саласындағы өзара іс-қимылды ұйымдастыру туралы келісімге қол қою туралы" қаулы қабылдады.

Келісім Тараптардың ынтымақтастықты жүзеге асыратынын және келесі бағыттар бойынша іс-қимылдарды үйлестіруді қамтамасыз ететінін көздейді:

• Тараптар мемлекеттерінің аумағында орналасқан теміржол көлігі инфрақұрылымын және автомобиль жолдары учаскелерін, сондай-ақ тараптар мемлекеттерінің аумағында орналасқан автомобиль және теміржол өткізу пункттерін дамыту жөніндегі іс-шараларды келісу және іске асыруды қамтамасыз ету;
• Тараптар мемлекеттерінің аумағында көлік инфрақұрылымы объектілерінің және өткізу пункттерінің тиісті пайдалану жай-күйін және жеткілікті өткізу қабілетін қамтамасыз ету;
• Көлік және көлік инфрақұрылымын дамыту саласында тәжірибе және ақпарат алмасу;
• Қазақстан мен Ресей арасындағы мемлекеттік шекара арқылы теміржол көлігі мен инфрақұрылымды, автомобиль жолдарын, сондай-ақ автомобиль және теміржол өткізу пункттерін дамыту саласындағы ынтымақтастықтың өзара келісілген өзге де бағыттары.

Сондай-ақ, тараптар келісім шеңберінде өздерінің құзыретті органдары бекітетін іс-шаралар жоспарларын ("жол карталарын") орындау бойынша келісілген шаралар қабылдайтыны айтылады:

• теміржол көлігін және теміржол көлігінің инфрақұрылымын дамыту;
• Тараптар мемлекеттерінің аумағында орналасқан автомобиль жолдарының учаскелерін дамыту;
• Қазақстан-Ресей мемлекеттік шекарасы арқылы автомобиль өткізу пункттерін дамыту;
• Қазақстан-Ресей мемлекеттік шекарасы арқылы теміржол өткізу пункттерін дамыту.

Іс-шаралар жоспарларын ("жол карталарын") бекіту кезінде құзыретті органдар тараптар мемлекеттері арасындағы автомобиль және темір жол тасымалдарында, сондай-ақ олардың аумақтары бойынша автомобиль және теміржол транзитінде жүк базасының жаңа көлемдерін тарту мақсатында автомобиль және теміржол жүк ағындарын синхрондау қажеттілігін басшылыққа алады.

Қаулы қол қойылған күнінен бастап қолданысқа енгізіледі.