Қазақстан Арал теңізіне рекордтық су көлемін жіберуді жоспарлап отыр

2025 жылдың сәуіріне дейін Арал теңізіне шамамен 1,6 млрд текше метр су жіберу жоспарланып отыр. Бұл туралы Су ресурстары және ирригация министрі Нұржан Нұржігітов мәлімдеді, деп хабарлайды Zakon.kz.

Министр 2023 жылдың қазан айынан 2024 жылғы сәуірге дейін Арал теңізіне шамамен 1,3 млрд текше метр, ал жыл басынан бері 2 млрд текше метр су жіберілгенін атап өтті.

"Бүгінгі таңда теңіздегі судың жалпы көлемі 22 млрд текше метрге жетті. Су дипломатиясы мен Орталық Азиядағы әріптестерімізбен тығыз жұмыстан бөлек, теңізді толтыруда су үнемдеу технологияларын енгізу де маңызды рөл атқарады. Жаңа технологияларды енгізудің нәтижесінде биыл Қызылорда облысының шаруалары 200 млн текше метрге жуық су үнемдеді",- деді ол.

Сондай-ақ, ол үнемделген су Солтүстік Аралға жіберілгенін де нақтылады.

"Мәселе өте маңызды, біз оны жан-жақты қарастырып, үнемі бақылауда ұстаймыз". Нұржан Нұржігітов

Бұған дейін Қазақстанда мемлекеттік су шаруашылығы құрылыстарының тізбесі кеңейтілгені хабарланған болатын.