FIFA әлем чемпионатының финалынан кейінгі жанжалға байланысты Аргентина құрамасына қатысты тергеу бастады

Халықаралық футбол федерациясы әлем чемпионатының финалынан кейін болған оқиғаларға байланысты Аргентина құрамасына қатысты тергеу бастады, деп хабарлайды Zakon.kz.

Yahoo Sports басылымының жазуынша, Испаниядан 0:1 есебімен жеңілгеннен кейін аргентиналық футболшылардың әрекеті қоғамда үлкен резонанс туғызып, көпшіліктің сынына ұшыраған.

Мәліметке сәйкес, жартылай қорғаушы Леандро Паредес матч аяқталғаннан кейін қызыл қағаз алған. Ол Испания құрамасының қорғаушысы Эрик Гарсияны мойнынан ұстап, жерге құлатқан. Одан кейін Гавимен жанжалдасып, оған соққы жасауға әрекеттенген.

Назарға іліккен тағы бір ойыншы – қорғаушы Науэль Молина. БАҚ мәліметінше, испаниялықтар жеңісті тойлап жатқан кезде ол команда капитаны Родриді дене тұсынан ұрып жіберген. Осыдан кейін футболшылар арасында сөзге келу басталған.

Сондай-ақ жанжалға Аргентина құрамасы бас бапкерінің көмекшісі Роберто Аяла да араласқан. БАҚ-тың хабарлауынша, төбелес кезінде ол Испания құрамасының жартылай қорғаушысы Дани Ольмоға қол көтеруге әрекет жасаған. Алайда Эрик Гарсия араласып, жанжалға қатысушыларды ажыратып жіберген.

Ұлыбритания құрамасының бұрынғы футболшылары Алан Ширер, Гари Невилл және Джо Харт Аргентина құрамасының әрекетін қатаң сынға алды. Ширер болған жағдайды "сұмдық" деп бағаласа, Невилл оны "масқара" деп атады. Ал Харт қарсыласқа құрмет көрсеткен жалғыз аргентиналық ойыншы Лионель Месси болғанын айтты. Оның сөзінше, Месси матч аяқталғаннан кейін Испания құрамасының футболшыларымен қол алысып шыққан.

Айта кетейік, әлем чемпионатының финалында Испания құрамасы қосымша уақытта Ферран Торрестің соққан голының арқасында жеңіске жетті.