Әскери сот Дәулет Тұрлыхановтың ұлына қатысты апелляциялық шағымды қарастыруда

2023 жылы 29 қарашада ҚР Әскери соты бұзақылық ниетпен екі адамның денсаулығына қасақана орташа ауырлықтағы зиян келтірді деп айыпталған әскери қызметші Нұрасыл Болатқа қатысты қылмыстық іске қатысты апелляциялық шағымды қарастыра бастады, деп хабарлайды Zakon.kz.

Бұған дейін бірінші сатыдағы үкіммен әскери қызметші Нұрасыл Болатқа ҚР ҚК-нің 107-бабының 1-тармағы және 2-бөлігінің 5-тармағы бойынша 500 АЕК, яғни 1 725 000 теңге мөлшерінде айыппұл салынған. Жәбірленушілердің пайдасына 1 млн теңге көлемінде моральдық өтемақы өндірілді.

"Іс жәбірленушілердің апелляциялық шағымдары бойынша сотқа келіп түсті. Олар сотталушыға бас бостандығынан айыру жазасын тағайындауды сұрайды. Прокурор да ақшалай айыппұлды бас бостандығын шектеу түріне ауыстыруды сұрайды. Сотталғанның адвокаты, керісінше қорғауындағы адамды ақтауды сұрады. Сотталушы жасаған әрекетін мойындап, тиісті жазаны өткеруге дайын және оны соттың қарауына қалдырады", делінген Әскери соттың баспасөз қызметінің хабарламасында.

Айта кетсек, 11 ақпанда сағат 02.00 шамасында шұғыл қызметтегі әскери қызметші Алматының түнгі клубтарының бірінің жанында болғанда бұзақылық ниетпен ерлі-зайыпты адамдарға дене жарақатын келтірген.