Esentai City, Monblanc және басқалары: Алматыдағы проблемалы элиталық тұрғын үй кешендерінің жағдайы қандай

Алматы әкімдігі бүгін, 2026 жылғы 12 қазанда, бірнеше тұрғын үй кешенінің үлескерлеріне қатысты мәселелерді шешуге бағытталған маңызды шешімдер қабылданғанын мәлімдеді, деп хабарлайды Zakon.kz.

Атап айтқанда, Esentai City тұрғын үй кешеніндегі жылжымайтын мүлікке салынған тыйымды алып тастау және құрылысты жалғастыру мәселесі шешілді. Ал "Достар Делюкс" тұрғын үй кешенінің үлескерлеріне келтірілген залалды өтеу тетігі меншік иелерінің бастамашыл тобына ұсынылды.

Monblanc тұрғын үй кешенінің құрылысын жалғастыру үшін жер учаскесін сатып алуға және үлескерлерге келтірілген залалды өтеуге дайын инвестор анықталды. Қазір инвестор мен үлескерлер арасындағы тиісті келісімдер әзірленіп жатыр.

Заңсыз салынған Pine Hill және Sky Club тұрғын үй кешендерінің құрылыс салушысына қатысты қылмыстық іс тергелген.

"Ведомствоаралық комиссия инвестормен келісімге келді. Жер учаскелеріне салынған тыйымды алып тастау және жоғалған құжаттарды қалпына келтіру рәсімдері аяқталғаннан кейін учаскелер инвесторға беріледі. Бұдан соң инвестор үлескерлер алдындағы берешекті өтеу міндеттемелерін өз мойнына алады", – деп хабарлады Алматы әкімдігінің баспасөз қызметі.

Әкімдіктің мәліметінше, комиссия бірқатар проблемалы тұрғын үй кешенінің үлескерлеріне қатысты мәселелерді шешу жұмысын жалғастырып жатыр. Олардың қатарында қылмыстық істер бойынша тергеудің аяқталуы күтіліп отырған "Швейцария", Silver Hills және басқа да кешендер бар.

Әкімдік баспана сатып алуды жоспарлап жүрген азаматтарға да ескерту жасады.

"Жаңа салынған тұрғын үйді сатып алмас бұрын құрылыс салушыда құжаттардың толық топтамасы бар-жоғын тексеруді немесе нысанның мәртебесін Қала құрылысын бақылау басқармасының +7 705 89 66 000 нөміріндегі WhatsApp анықтама арнасы арқылы нақтылауды қатаң ұсынамыз. Жұмыс кестесі: дүйсенбі–жұма, сағат 09:00-ден 18:00-ге дейін", – делінген хабарламада.

Бұған дейін, 2026 жылғы 7 қазанда, Алматыдағы Достық даңғылы, 44 мекенжайында орналасқан белгілі "Три богатыря" тұрғын үй кешеніндегі бұрынғы "Искра" кинотеатрының үй-жайын қайта жаңғырту жұмыстары тоқтатылғаны белгілі болды. Құзға өрмелеуге арналған қабырға салу жұмыстары қажетті рұқсат құжаттары мен жобалық құжаттамасыз жүргізілген.