Елімізде үш күн ішінде жалған нөмірмен жүрген 900-ден астам көлік анықталды

2026 жылдың 8–10 қаңтары аралығында Қазақстанда жалған мемлекеттік тіркеу нөмірлік белгілерін пайдалану фактілерінің жолын кесуге бағытталған жедел-профилактикалық іс-шара өткізілді. Оның қорытындысын Бас көлік прокуратурасы жариялады, деп хабарлайды Zakon.kz.

Құзырлы ведомство мәліметінше, іс-шара барысында еліміздің республикалық маңызы бар автомобиль жолдарында жалған, қолдан жасалған немесе оқылмайтын мемлекеттік тіркеу нөмірлік белгілері бар көлік құралдарын басқарудың 900-ден астам фактісі анықталды.

Талдау көрсеткендей, жүргізушілер жалған нөмірлік белгілерді көбінесе:

• ақылы автомобиль жолдарымен жүріп өткені үшін төлем жасаудан жалтару,
• белгіленген жылдамдық шектеулерін асыру,
• сондай-ақ салмақ-габариттік бақылаудан өту кезінде жүк көліктерінің нақты салмағын жасыру мақсатында пайдаланған.

"Сонымен қатар, 2025 жылдың қорытындысы бойынша ел аумағында жалған мемлекеттік тіркеу нөмірлік белгілерін пайдалану бойынша 40 мыңнан астам факт анықталған".ҚР Бас көлік прокуратурасы

Прокуратура органдары мұндай құқық бұзушылықтар жол қозғалысы қауіпсіздігіне қатер төндіріп, жол-көлік оқиғаларының туындауына ықпал ететінін атап өтеді.

Бұған дейін ІІМ мен ДСМ көлік айдауға болмайтын ел азаматтарын анықтағаны хабарланған. Мәселен, 2025 жылдың 10 желтоқсанындағы жағдай бойынша сот органдарына 4 540 талап-арыз жіберіліп, оларды қарау нәтижесінде 1 787 жүргізуші куәлігінің күші жойылды. Аталған азаматтардың медициналық қарсы көрсетілімдеріне байланысты көлік құралын басқаруға құқығы болмаған.