Астанадағы LRT жобасының түпкілікті құны жарияланды

2026 жылғы 12 мамырда City Transportation Systems басқарма төрағасы Асылбек Дүйсебаев Астанадағы LRT жобасының жалпы құны туралы мәлімдеді, деп хабарлайды Zakon.kz тілшісі.

Оның айтуынша, жобаның құны 2016 жылы бекітілген және 1,8 млрд АҚШ долларын құрайды.

"Бүгінгі күнге дейін жобаның жалпы құны өзгерген жоқ. Сонымен қатар техникалық сипаттамалары жетілдіріліп, пойыздардың моделі мен дизайны жаңартылды. Сондай-ақ LRT желісі бойында абаттандыру жұмыстары жүргізілді", – деді Асылбек Дүйсебаев.

Оның сөзінше, LRT жүйесінің жұмысын қамтамасыз ету үшін 1000-нан астам маман жұмылдырылады. Оның ішінде 300-і шетелдік маман болады.

Сондай-ақ журналистер LRT желісін Қосшыға және қаланың оң жағалауына дейін ұзарту құны туралы сұрады.

Бұл жөнінде басқарма төрағасы жақын арада мемлекеттік сараптама қорытындысы жарияланып, жобаның нақты құны белгілі болатынын айтты.

"Жақын уақытта мемлекеттік сараптаманың қорытындысы шығады. Сол кезде жобаның түпкілікті құны нақтыланады. Бірақ оның бағасы 15 жыл бұрын есептелген жобалық құннан қымбат болмайды деп ойлаймын", – деді ол.

Айта кетейік, бұған дейін LRT желісінің Қосшыға дейін қашан ұзартылатыны туралы ақпарат жарияланған болатын.