Астанада автобус жолақысы 150 теңге болып, қымбаттауы мүмкін

Астанада 2026 жылдың желтоқсанынан бастап қоғамдық көлікте онлай төлем жасау 110 теңгеден 150 теңгеге қымбаттату ұсынылды, деп хабарлайды Zakon.kz.

Бұл туралы бүгін, 5 қазанда, елорда әкімдігінің баспасөз қызметі мәлімдеді.

"Пайдалану шығындарының өсуіне, қоғамдық көліктің тұрақты жұмысын қамтамасыз ету, автобус паркін одан әрі жаңарту және маршруттық желіні дамыту қажеттілігіне байланысты 1 желтоқсаннан бастап қолма-қол ақшасыз төлем жасағандағы жолақы құнын 150 теңге мөлшерінде белгілеу ұсынылады", – делінген хабарламада.

Берілген ақпаратқа сәйкес, Астанада қоғамдық көліктегі жолақы 2014 жылы 90 теңге болатын. Содан бері 12 жыл ішінде жолақы құны бір-ақ рет қымбаттап, қазіргі уақытқа дейін 110 теңге.

Мәселен, 2014 жылы дизель отынының бір литрі шамамен 107 теңге болса, қазір оның бағасы 329 теңгені құрайды. Осылайша, аталған кезеңде дизель отынының бағасы үш еседен астам өскен.

Осы кезеңде қосалқы бөлшектердің, автокөлік шиналарының, аккумуляторлардың, автобустарға техникалық қызмет көрсету мен жөндеу жұмыстарының, сондай-ақ жаңа көлік құралдарын сатып алу құны да едәуір қымбаттаған.

Пайдалану шығындарының айтарлықтай өсуіне қарамастан, елордада қоғамдық көлікті жаңарту және дамыту жұмыстары жоспарлы түрде жалғасып жатқаны атап өтілді. Соңғы үш жылда тасымалдаушылар заманауи қауіпсіздік, жайлылық және экологиялық талаптарға сай 1127 жаңа автобус сатып алған.

Ал тегін жүру құқығы мына санаттағы азаматтарға беріледі:

1) Ұлы Отан соғысының ардагерлері мен мүгедектері және оларға теңестірілген адамдар;

2) жасы және еңбек өтілі бойынша зейнеткерлер, сондай-ақ зейнет жасына жеткен жасы бойынша және асыраушысынан айырылуына байланысты мемлекеттік әлеуметтік жәрдемақы алушылар;

3) көпбалалы аналар;

4) көпбалалы отбасылар;

5) мүгедектігі бар адамдар;

6) 18 жасқа дейінгі мүгедектігі бар балалар, сондай-ақ олардың ата-аналарының (заңды өкілдерінің) бірі;

7) Қазақстандағы 1986 жылғы 17-18 желтоқсандағы оқиғаларға қатысушылар қатарындағы саяси қуғын-сүргін құрбандары, "Жаппай саяси қуғын-сүргін құрбандарын ақтау туралы" ҚР Заңында белгіленген тәртіппен ақталған адамдар.

Сонымен қатар 2020 жылғы наурыздан бастап Астанада оқитын 18 жасқа дейінгі балалар үшін қоғамдық көлікте тегін жүру мүмкіндігі қарастырылған.