Астанада Atyrau Creative Days жәрмеңкесі ашылды

Шара барысында Атырау облысының шығармашылық өкілдері өз жұмыстарын елорда тұрғындары мен қонақтарына таныстырады, деп хабарлайды Zakon.kz.

Жәрмеңкеге Атырау облысы әкімінің орынбасары Марат Мурзиев және Қазақстан Республикасының Мәдениет және ақпарат вице-министрі Евгений Кочетов қатысты. Қонақтар жәрмеңке алаңын аралап, шығармашылық өкілдердің жұмыстарымен танысты.

Жәрмеңкенің ашылу бағдарламасы "Sarmad" этно-фольклорлық ансамблінің өнерімен басталып, Атырау жастар театрының музыкалық бағдарламасымен жалғасты.

Бағдарламаның сән бөлігінде Атырау облысынан арнайы келген дизайнерлердің авторлық киім топтамалары дефиле форматында көпшілік назарына ұсынылды.

Жәрмеңке ертең де жалғасады. Келушілер Атыраудың өнері, дизайны, қолөнері мен креативті жобаларымен жақынырақ танысып, өзіне ұнаған бұйымдарды тікелей авторларынан сатып ала алады.