Ассамблея – бейбітшілік пен келісімнің ерекше институты

Тәуелсіздік алған сәттен бастап Қазақстан халқы Ассамблеясы бірлік, бейбітшілік пен келісім идеалдарына адалдықтың символына айналған стратегиялық маңызды институт ретінде орнықты.

Тәуелсіздік алған сәттен бастап Қазақстан халқы Ассамблеясы бірлік, бейбітшілік пен келісім идеалдарына адалдықтың символына айналған стратегиялық маңызды институт ретінде орнықты. Ол жай ғана диалог алаңы емес, әрбір дауыс естілетін, ал мәдениеттердің сан алуандығы күш пен тұрақтылықтың қайнар көзіне айналатын ұлттық сенімнің тірегіне айналды.

Біріншіден. Қазақстан халқы Ассамблеясы жастар мәдениетін дамытуға елеулі үлес қосуда. Ол қазіргі заманғы жастар мәдениетін қалыптастыруға, азаматтық кемелдік пен мәдениетаралық диалогтың берік негіздерін қалауға ықпал етуде. Мұның жарқын мысалы – Орталық Азия аймағындағы халықаралық жастар ынтымақтастығын нығайтуға бағытталған "Jastar Generation" бастамасы. Осы жобаның аясында 2024 жылы Алматы қаласында Қазақстан, Қырғызстан, Өзбекстан, Тәжікстан және басқа да елдердің жас көшбасшылары, белсенділері мен еріктілері қатысқан халықаралық жазғы лагерь ұйымдастырылды. Бұл лагерь өңірлік ынтымақтастықты қалыптастыру, көшбасшылық құзыреттерді дамыту және Орталық Азия жастары алдында тұрған өзекті мәселелерге бірлесіп жауап табу үшін тиімді алаңға айналды.

Екіншіден. Этносаралық өзара әрекеттестік жергілікті және ұлттық деңгейде тұрақты даму мен қоғамдық қауіпсіздіктің негізгі факторларының бірі болып қала береді. 2024 жылғы "Жастар" ҒЗО социологиялық зерттеуінің деректері бойынша, Қазақстан жастарының көпшілігі елдегі этносаралық жағдайды тұрақты және қолайлы деп бағалайды: респонденттердің 93,6%-ы этникалық тиесілігіне байланысты қысым көрмегенін атап өтті. Тек 10,3% ғана мемлекеттік тілді білмеуіне байланысты кемсітушілікке ұшырағанын айтты. Респонденттердің 80,5%-ы өз елді мекендерінде этносаралық қақтығыстардың туындау ықтималдығы жоқ деп есептейді. Тек 16,3% мұндай ықтималдықты мойындаса, 3,2% жауап беруге қиналды.

Үшіншіден. Жастардың азаматтық белсенділігі мен Қазақстан халқы Ассамблеясының рөлі. Қазақстан жастарының азаматтық белсенділігі, негізінен, еріктілік пен әлеуметтік бастамаларға қатысу арқылы көрініс табады және бұл оң үрдіс тұрақты дамуда. 2024 жылғы "Жастар" ҒЗО социологиялық зерттеуінің деректері бойынша, жастардың ең танымал қатысу формалары: еріктілер қозғалысына қатысу (17,2%), жастар жобалары мен ұйымдарына қатысу (15,5%), қайырымдылық (13,8%) және экологиялық ұйымдарға қатысу (10,5%).

Сонымен қатар, жастар қайырымдылық (23,8%), еріктілер ұйымдарына (22,3%), кәсіпкерлікті дамыту жобаларына (22,3%) және экологиялық ұйымдарға (21,8%) қатысуға тұрақты қызығушылық танытуда.

Төртінші. Қазақстан халқы Ассамблеясы жанында "Жас ғалымдар клубы" жұмыс істейді.

Бүгін Қазақстан халқы Ассамблеясының 30 жылдығына арналған сессияда Мемлекет басшысы өз сөзінде "Жас ғалымдар клубы" туралы орынды айтып өтті. Бұл клуб жас ғалымдар үшін бірлік, патриотизм және азаматтық жауапкершілік мектебіне айналып келеді.

Клубтың тең төрағасы ретінде мен осындай маңызды жобаның бір бөлігі болғаныма қуаныштымын. Бұл клуб маған ұлтаралық келісімді нығайтуға, диалог мәдениетін дамытуға және жастар арасында азаматтық кемелдікті қалыптастыруға өз үлесімді қосуға мүмкіндік берді.

Бүгінде Жас ғалымдар клубы – тек ғылыми идеялармен алмасу алаңы ғана емес. Бұл – қазіргі заманның ең өзекті сын-тегеуріндеріне интеллектуалды жауап іздейтін және табатын, бірлік пен прогресті идеологиялық тұрғыдан негіздейтін жастар қауымдастығы.

Олжас Бейсенбаев,

"Жастар" ғылыми-зерттеу орталығының директоры