Алматыдағы метро бекеттерінде концерттер, спектакльдер мен көрмелер өтеді

Наурыз мерекесіне орай Алматы метросы мәдени шаралардың орталығына айналады. 20-25 наурыз аралығында қала тұрғындары мен қонақтары метро бекеттерінде театр артистерінің өнерін және қазақ халқының мәдениетін дәріптеу мақсатында ұйымдастырылған фотокөрмелерді тамашалай алады.

"Мұхтар Әуезов атындағы театры" метро бекетінде музыкалық бағдарлама және фотокөрме өтеді

Дәл осы бекетте 20 наурыз күні Ықылас Дүкенұлы атындағы музыкалық аспаптар мұражайы қорынан қазақ халқының ұлттық музыкалық аспаптарының фотосуреттері көрсетілмек. Сағат 12:00-де Саят Нұрғазин мен Даурен Байбөрі жеке концерттерін өткізіп, қала тұрғындарына әсерлі музыкалық туындыларын ұсынбақ.

Дәстүрлі ойындар мен ұлттық әуеніміз "Байқоңыр" бекетінде.

Бұл бекетте қазақ халқының дәстүрлі ойындарына арналған фотосуреттер қойылады. 21 наурыз күні сағат 13:00-де "Сазген Сазы" ансамблі ұлттық аспаптардың үнімен музыкалық шоу көрсетпек.

"Жібек жолы" бекетіндегі театр қойылымы

Бұл бекетте ұсынылатын фотокөрме қазақ халқының салт-дәстүрлері мен тұрмысын этнографиялық суреттер арқылы жолаушыларға таныстырады. 23 наурыз күні сағат 12:00-де "Жаңа Ғасыр" театры "Алматы Махаббатым" спектаклін қойып, көрермендерді махаббат тарихы арқылы қаланың ерекше атмосферасына жетелемек.

"Алмалы" станциясындағы зергерлік өнер және этно-шоу

Метро жолаушылары ХХ ғасырдың басындағы қазақ халқының зергерлік әшекейлерінің фотосуреттерімен танысып, ұлттық нақыштағы өнер туындыларын тамашалай алады. 24 наурыз күні сағат 15:00-де көрме "ASU" фольклорлық-этнографиялық ұжымы көрсететін этно-шоу арқылы толықтырылып, жолаушыларға мерекелік көңіл-күй сыйламақ.

"Сарыарқа" бекетінде Алматы қаласының Наурыз тарихы

Бұл бекеттегі фотожоба 1980-ші жылдардың соңынан 1990-шы жылдардың басындағы Алматыдағы Наурыз мерекесінің тойлануын баяндайды. 25 наурыз күні сағат 15:00-де "Алматы Махаббатым" қойылымын тағы да тамашалай аласыздар.

Фотокөрме күнделікті сағат 10:00-ден 21:00-ге дейін жұмыс істейді. Метро жолаушылары пойызды күткен сәтте қазақ халқының мәдени мұрасымен тереңірек танысып қана қоймай, театр қойылымдарын көріп, өнерпаздардың шығармаларын тамашалай алады.