Алматыда үстіне ағаш құлаған 19 жастағы бойжеткен көз жұмды

Алматыда үстіне ағаш құлап, ауыр жарақат алған 19 жастағы Селина Абитова ауруханаға түскеннен кейін екі апта өткен соң қайтыс болды, деп хабарлайды Zakon.kz.

Бұл туралы 10 шілде күні №4 қалалық клиникалық аурухананың баспасөз қызметі мәлімдеді.

"Науқас 27 маусым күні №4 қалалық клиникалық ауруханаға өте ауыр жағдайда жеткізілді. Жағдайының ауырлығына байланысты анестезиология, реанимация және қарқынды терапия бөлімінде ем қабылдады", – делінген хабарламада.

Аурухана мәліметінше, дәрігерлер оның өмірін сақтап қалу үшін барлық қажетті емдеу шараларын жүргізген. Реанимация бөлімінде науқастың жағдайын дәрігер-реаниматологтар мен орта буын медицина қызметкерлері тәулік бойы бақылауда ұстаған.

"Жүргізілген барлық емдік және диагностикалық шараларға қарамастан, науқастың жүрегі 14-күні тоқтады. Реанимациялық іс-шаралар жүргізілгенімен, оның биологиялық өлімі тіркелді", – деп хабарлады медициналық мекеме.

№4 қалалық клиникалық ауруханасының дәрігерлері мен әкімшілігі марқұмның туған-туыстары мен жақындарына көңіл айтты.