Алматыда лаңкестік туралы жалған хабар таратқан ер адам сотталды

Алматы соты террорлық акт туралы жалған хабарлама жасаған ер адамға үкім шығарды, деп хабарлайды Zakon.kz.

Оқиға өткен жылдың желтоқсан айында болған. Құқық бұзушы мас күйінде жедел қызметке қоңырау шалып, қаладағы сауда орталықтарының бірінде жарылыс болатыны туралы хабар берген. Бұл ақпарат түскен бойда құқық қорғау органдары шұғыл әрекетке кірісіп, ғимараттан адамдарды эвакуациялап, нысанды толық тексерді. Тексеру барысында қоңыраудың жалған екені анықталды.

Осылайша, күдіктінің әрекеті төтенше жағдайлар қызметінің жұмысына кедергі келтіріп, материалдық шығынға себеп болды. Соттың шешімімен ол кінәлі деп танылып, бір жылға бас бостандығынан айырылды.

"Мұндай жалған хабарламалар төтенше қызметтердің құнды ресурстарын ысырап етіп, олардың негізгі міндеттерін атқаруына кедергі жасайды. Сондай-ақ тұрғындар арасында негізсіз үрей туғызады. Террорлық акт туралы жалған ақпарат таратудың қылмыстық жауапкершілікке әкелетінін ескертеміз. Барша азаматты жауапкершілікке шақырамыз және мұндай әрекеттердің жазасыз қалмайтынын естен шығармауға кеңес береміз", - деді Алматы полиция департаменті экстремизмге қарсы күрес басқармасының бастығы Асхат Дәулетияров.