Алматыда екі полицей 14 жастағы қызды зорлаған

Ішкі істер министрі алматылық екі полицейдің 14 жастағы қызды зорлағанын растады. Келеңсіз жағдайдан кейін екеуі де қызметінен босатылған. Тергеу әлі жалғасып жатыр дейді Ержан Сәденов.

— Осындай факт болды. Дереу қызметтік тексеріс жүргізіліп, комиссия отырысы болып, екеуі ішкі істер органдары қатарынан, қызметтен шығарылды. Қылмыстық істің шеңберінде қамауға алынды. Қазір тергеу-тексеру жүргізіліп жатыр.

Қылмыс жасаған полиция капитандары Алатау аудандық ішкі істер бөлімінде қызмет етіпті. Ал оқиға 4 желтоқсанда болғанымен, іс араға тек төрт күн салып қозғалған. Ішкі істер министрлігі оқиғаның мән-жайын айта алмаймыз деп артық тіс жармады. Күдіктілердің кінәсі дәлелденсе, 2009 жылғы кәмелетке толмаған жеткіншекті зорлағаны үшін ҚР ҚК 120-бабы, 2-бөлігі, яғни «зорлау» дерегі бойынша 9 жылдан 12 жылға дейін бас бостандығынан айырылуы мүмкін.