Абай облысындағы орман өртін сөндіруге 300-ден астам адам жұмылдырылды

"Семей орманы" резерватындағы өртті сөндіруге жұмылдырылған адам саны 300-ден асты, деп хабарлайды Zakon.kz.

ҚР ТЖМ баспасөз қызметінің мәліметінше, 9 маусым күні таңертең Семей орманындағы өртті сөндіруге қатысып жатқандар саны екі есеге артты. Қазір оқиға орнында Төтенше жағдайлар министрлігінің, Орман шаруашылығы комитетінің, Қорғаныс министрлігінің 300-ден астам адамы, 70 техникасы жұмыс істеп жатыр.

"Төрт тікұшақ тартылды, өрт аумағы аэровизуалды тексеріліп, өрт ошақтарына су төгілді".ҚР ТЖМ баспасөз қызметі

Төтенше жағдайлар министрі Юрий Ильиннің өкімімен күштер мен құралдарды үйлестіру үшін өрт орнына ТЖ вице-министрі М. Күлдіков жіберілді.