118 миллион теңге құмар ойынға және жаңа автокөлікке кеткен: Қазақстандағы ірі жымқыру оқиғасы

Қазақстанның батысындағы мемлекеттік кәсіпорындардың бірінде прокуратура қомақты мөлшердегі бюджет қаражатының жымқырылғанын анықтады, деп хабарлайды Zakon.kz.

Батыс Қазақстан облысы прокуратурасының баспасөз қызметінің алдын ала мәліметіне сәйкес, кәсіпорынның есепшісі құмар ойынға тәуелді бола отырып, мекеме қаражатын ойын тігетін кеңседе заңсыз пайдаланған.

Сондай-ақ күдікті жымқырылған қаражатқа жаңа автокөлік сатып алған.

"Мемлекетке келтірілген жалпы шығын 118 миллион теңгені құрады", — деп мәлімдеді Батыс Қазақстан облысы прокуратурасының баспасөз қызметі.

Аталған дерек бойынша бөтеннің мүлкін аса ірі мөлшерде заңсыз иемдену фактісімен Қазақстан Республикасы Қылмыстық кодексінің 189-бабы 4-бөлігінің 2-тармағына сәйкес сотқа дейінгі тергеп-тексеру басталды. Тергеуді арнайы прокурорлар жүргізіп жатыр.

Соттың санкциясымен күдікті тергеу изоляторына қамалды. Автокөлікке тыйым салынды.

Тергеп-тексеру барысы туралы өзге мәліметтер Қазақстан Республикасы Қылмыстық-процестік кодексінің 201-бабына сәйкес жария етілмейді.

Бұған дейін Абай облысында бұрынғы әкім "Ауданның құрметті азаматы" атағынан айырылғаны хабарланған еді.