19 қазаннан бастап қазақстандықтарға скринингтен өту туралы SMS жіберіледі

Қазақстанда 2026 жылғы 19 қазаннан бастап скринингтер туралы SMS арқылы хабарлаудың пилоттық жобасы іске қосылады. Ал 26 қазаннан бастап жасалған екпелер туралы хабарламалар жіберу жоспарланып отыр, деп хабарлайды Zakon.kz.

19 қазаннан бастап Ақмола, Абай және Ұлытау облыстарында 1414 бірыңғай байланыс орталығы арқылы азаматтарға скринингтен өту қажеттігі туралы жеке SMS-ескертулер жіберу жоспарланған.

Хабарлама алған азамат тексеруден өту үшін өзі тіркелген емханаға жүгіне алады.

Сонымен қатар биылғы 26 қазаннан бастап ел бойынша жасалған екпелер туралы SMS-хабарламалар жіберу жоспарланып отыр. Екпе туралы мәлімет медициналық жүйеге тіркелгеннен кейін азаматқа немесе баланың заңды өкіліне екпенің түрі мен салынған күні көрсетілген хабарлама келеді.

Денсаулық сақтау министрлігінің түсіндіруінше, мәліметтер шындыққа сәйкес келмесе, азамат 1414 нөміріне жауап хабарлама жіберіп, бұл туралы хабарлай алады. Ақпарат тексеру үшін Санитариялық-эпидемиологиялық бақылау комитетіне жолданады.

Сонымен қатар министрлік медициналық қызметтің нақты көрсетілгенін растауға мүмкіндік беретін пациенттерді цифрлық сәйкестендіру жүйесін кеңейтіп жатыр.

7 қазандағы жағдай бойынша тіркелген 135,9 млн қабылдаудың 73%-ы цифрлық сәйкестендіру арқылы расталған.

Қазір бұл тетік медициналық қызметтің 1 278 түрін қамтиды. Биылғы 1 желтоқсаннан бастап тізбеге консультациялардың, диагностикалық зерттеулер мен медициналық рәсімдердің тағы 736 түрін қосу жоспарланған.

Министрлік цифрлық сервистерді енгізу профилактикалық тексерулердің қолжетімділігін арттыруға, пациенттердің құқықтарын қорғауға, медициналық деректердің дұрыстығын және денсаулық сақтау саласын қаржыландырудың ашықтығын қамтамасыз етуге бағытталғанын атап өтті.