Эверест тауында гидтердің альпинистерді әдейі улағаны туралы мәлімет тарады

Эверестке шығу және түсу кезінде туристерді ертіп жүретін кейбір гидтер әдейі альпинистердің тамағына зиянды зат қосып, олардың жағдайын нашарлатқан. Мұндағы мақсат – кейін оларды тікұшақпен эвакуациялап, сақтандыру компанияларынан ақша алу, деп хабарлайды Zakon.kz.

Daily Mail басылымының жазуынша, әлемдегі ең биік таудағы ауа райының қолайсыздығы мен байланыс тұрақсыздығы алаяқтықтың тұтас бір жүйесін қалыптастырған. Бұл жүйеде кейбір ұшқыштар, гидтер және дәрігерлер шын мәнінде көрсетілмеген қызметтер үшін сақтандыру компанияларына жалған есептер жіберген.

Тікұшақ арқылы "құтқару" операцияларының жалпы құны шамамен 15 миллион фунт стерлингке жеткен.

Алаяқтық схеманың мәні мынадай: альпинистке жалған түрде ауыр жағдай жасалғандай көрініс ұйымдастырылады. Содан кейін тікұшақ шақырылып, ол жақын маңдағы ауруханаға жеткізіледі. Кейін сақтандыруға нақты жағдайға сәйкес келмейтін өтемақы талап етіледі.

Непал полициясының Орталық тергеу бюросы бұл схеманың екі түрлі жолмен жүзеге асырылғанын анықтады.

Бірінші жағдайда, кейбір туристер таудан жаяу түсуді қаламайды. Өйткені жаяу түсу екі аптаға дейін созылуы мүмкін. Сондықтан гидтер оларға "ауырып қалғандай" кейіп танытып, тікұшақ шақыруды ұсынған.

Ал екінші әдіс әлдеқайда қауіпті. Мұнда туристерді алдап, олардың жағдайы өте ауыр екенін және міндетті түрде ауруханаға жеткізу керек екеніне сендіреді.

3000 метрден жоғары биіктікте ауырып қалу жиі кездеседі. Оның белгілеріне бас ауруы, аяқ-қолдың шаншуы және қандағы оттегінің азаюы жатады. Көп жағдайда бұл демалу, су ішу немесе біртіндеп төмен түсу арқылы оңай түзетіледі.

Алайда полицейлердің мәліметінше, кейбір гидтер мен қонақүй қызметкерлері туристерді қорқытып, "жалғыз құтылу жолы – ауруханаға эвакуациялану" деген ойға сендірген.

Егер бұл әдіс нәтиже бермесе, кейбір жағдайларда гидтер туристерге арнайы дәрілер беріп немесе шамадан тыс көп су ішкізіп, ауру белгілерін күшейтуге тырысқан. Тіпті бір жағдайда туристердің тамағына қопсытқыш қосылып, олардың жағдайы әдейі нашарлатылған.

Бір тікұшақ бірнеше адамды бірге тасымалдаса да, сақтандыру компанияларына әр адам үшін бөлек-бөлек рейс жасалғандай есеп ұсынылған.

Бұл жағдайдың жолын кесу үшін үкімет шаралар қабылдады. Осы айдың басында Непалдың тергеу бюросы бұл іспен байланысты 32 адамға айып тақты. Қазіргі уақытта олардың 9-ы ұсталды, қалғандары қашып кеткен болуы мүмкін.

Айыпталғандардың қатарында үш тікұшақ компаниясының қызметкерлері, сондай-ақ үш түрлі аурухананың дәрігерлері мен әкімшілік өкілдері бар.