Зеленский Ұлыбританиямен арнайы келісімге отырды

Украина президенті Владимир Зеленский "Ұлыбританиямен 100 жылдық серіктестік туралы келісімді" ратификациялау туралы заң жобасын Жоғарғы Радаға ұсынды, деп хабарлайды Zakon.kz.

РБК мәліметінше, Ұлыбритания мен Украина 2025 жылдың қаңтарында 100 жылдық серіктестік туралы келісімге отырды, бірақ ол әлі күшіне енген жоқ. Ұлыбританияның Премьер-министрі Кир Стармер Үкімет басына келгелі бері бірінші рет сол кезде Киевке келісімге қол қою үшін келген.

Сапар барысында Стармер Лондон биыл Киевке "бұрынғыдан да көп қолдау көрсетеді" деп уәде берді.

Келісім екі елдің әскери және әскери емес салалардағы қатынастарын кеңейтуге және тереңдетуге арналған. Онда мынандай тармақтар қарастырылған:

• Украинаның қорғаныс әлеуетін нығайту, оның қауіпсіздігін күшейту және НАТО-ға мүшелікке өту бойынша "консенсус құру" туралы;
• экономикалық және сауда ынтымақтастығын кеңейту;
• энергетика, қоршаған орта және таза энергияға көшу саласындағы ынтымақтастықты нығайту;
• ақпараттық манипуляциялар мен шетелдің араласуына қарсы күрес.

Ұлыбритания үкіметі Лондон мен Киев келісім аясында Балтық, Қара және Азов теңіздерінің қауіпсіздігін күшейтуге ниетті екенін мәлімдеді. Ұлыбритания жариялаған декларация мәтінінде британдық тарап Киевке 2030/31 жылға дейін кем дегенде 3 миллиард фунт (шамамен 3,9 миллиард доллар) көлемінде жыл сайынғы әскери көмек көрсетуге уәде бергені айтылады.

Бұған дейін АҚШ президенті Дональд Трамп ХАМАС-ты келісімге шақырған болатын.