Ұлдана Мырзуанның өліміне қатысты іс: сотталушы өз кінәсін мойындамады

2026 жылғы 18 тамызда Астананың қылмыстық істер жөніндегі ауданаралық сотында фельдшер Ұлдана Мырзуанның өліміне қатысты іс бойынша сотталушы Сәуле Жұматайқызы өзіне тағылған айыпты мойындамайтынын мәлімдеді, деп хабарлайды Zakon.kz.

Судья Сәуле Жұматайқызынан өзіне тағылған айыптың мәні түсінікті ме екенін, айыпқа көзқарасын және сот талқылауы барысында жауап беруге ниетті- ниетсіз екенін сұрады. Сотталушы:

"Мен өзімді кінәсіз деп санаймын", – деп жауап берді.

Судья бұдан кейін сотталушыға алдын ала тергеу барысында кінәсін мойындауы немесе жоққа шығаруы соттағы ұстанымымен байланыстырылмайтынын түсіндірді.

"Сот сізге түсіндіреді: алдын ала тергеу барысында берген кінәні мойындау немесе мойындамау туралы жауабыңызбен байланысты емессіз. Кінәлі екеніңізді мойындайсыз ба, жоқ па деген сұраққа жауап беруге міндетті емессіз. Сотталушының жауап беруден бас тартуы оның өзіне қарсы түсіндірілмеуі тиіс. Сондай-ақ өз кінәсін мойындау және шын жүректен өкіну жауапкершілігі мен жазасын жеңілдететін мән-жайлар болып саналатыны түсіндіріледі. Сотталушы өз жауабын негіздеуге құқылы. Сотталушының үнсіз қалуы оның өз кінәсін мойындамағаны ретінде түсіндіріледі", – деді судья.

Осыдан кейін судья сотталушыдан өзіне тағылған айыпты мойындайтынын немесе мойындамаған жағдайда айыпты толық көлемде жоққа шығаратынын нақтылады.

"Жоқ, мойындамаймын", – деп жауап берді сотталушы.

Осыдан кейін сот отырысында 2026 жылғы 20 тамызға дейін үзіліс жарияланды.

Бүгін, 18 тамызда, Астананың қылмыстық істер жөніндегі ауданаралық сотында жедел медициналық жәрдем қызметінің фельдшері Ұлдана Мырзуанның қаза болуына қатысты іс қарала бастады.

Оқиға 2025 жылғы 8 қарашада болған. Сол күні Астанада Тәуелсіздік даңғылы бойындағы тұрғын үй кешенінің сыртқы кірпіш қаптамасының бір бөлігі мен кондиционер қондырғысы ғимараттың қасбетінен құлап, бес адам зардап шеккен.