Синоптиктер Қазақстандағы ауа райы туралы жаңа болжам жасады

Қазақстанда алдағы үш күнде ауа райы құбылмалы болады: кей өңірлерде жаңбыр қарға ұласса, кей жерлерде аптап ыстық +35°С-қа дейін жетеді, деп хабарлайды Zakon.kz.

Бұл туралы "Қазгидромет" РМК 2026 жылғы 23–25 мамырға арналған ауа райы болжамында мәлімдеді.

Синоптиктердің айтуынша:

23 мамырда Түркістан, Алматы және Жамбыл облыстарында қатты жаңбыр, бұршақ және екпінді жел күтіледі.

24–25 мамырда түнгі уақытта оңтүстік-шығыстың таулы аймақтарында жаңбырдың қарға ауысуы мүмкін.

Қалған өңірлерде негізінен жауын-шашынсыз ауа райы сақталады.

Сондай-ақ ел аумағында жел күшейеді, оңтүстікте шаңды дауылдар болуы мүмкін, ал түнгі және таңғы уақытта тұман түседі.

"Елдің солтүстік-шығысында, шығысында және орталығында түнгі уақытта -1…-3°С дейін үсік күтіледі", – делінген "Қазгидромет" хабарламасында.

Күндізгі температура біртіндеп көтеріледі:

• батыста – +28…+35°С дейін;
• солтүстікте және орталықта – +20…+32°С дейін;
• шығыста – +17…+25°С дейін;
• оңтүстікте – +22…+35°С дейін;
• оңтүстік-шығыста – +20…+28°С дейін.

Айта кетейік, бұған дейін синоптиктер 2026 жылғы жаз мезгілі туралы болжам жасап, елде +45°С-қа дейінгі аптап ыстық пен нөсер жаңбырлар болуы мүмкін екенін айтқан еді.