Шымкентте «Өткенге құрмет - бүгінге міндет» тазалық акциясы өтті

"Таза Қазақстан" республикалық экологиялық акциясы еліміздің барлық аймағында кең өріс алуда. Бұл игілікті жұмыс Шымкентте де ауқымын кеңейте түсті, деп хабарлайды Zakon.kz.

27 сәуірде таңертеңнен бастап қаладағы барлық ұйым мен мекемелердің қызметкерлері, тұрғындар мен ерікті жастар, ардагерлер мен оқушылар бұл игілікті шараға аса белсенділікпен атсалысуда.

Акция аясында белсенді тұрғындардың бастамасымен "Өткенге – құрмет, тіріге міндет" атты шарасына қаладағы 92 мешіттің діни қызметкерлері мен ерікті 3574 азамат қатысты.

Сурет: Шымкент қаласы әкімдігінің баспасөз қызметі

37 мұсылман зираттарының аумағын күл-қоқыстан, шөптерден тазартылып, қураған ағаштар кесілді.

Ал, "Жасыл аймақ" апталығы аясында ұйымдастырылған сенбілікке жас экологтардың қосқан үлесі де зор болды. Жасыл желек қатарын көбейтуге атсалысқан жас экологтарға қала тұрғындары да көмектесіп, ағаш көшеттерін отырғызу және ақтау жұмыстарын жүргізді.

Сурет: Шымкент қаласы әкімдігінің баспасөз қызметі

Игілікті бұл іс шарадан мектеп оқушылары да қалыс қалған жоқ. Белсенділер мектеп аулаларын абаттандырып, гүлдер отырғызды.

Ал еліміздің көк байрағын әлемде желбіретіп жүрген спортшыларымыз қаладағы Әл-Фараби көшесіне 100 түп көшет егіп, тазалық шараларын жүргізді.

Қаланың көркі оның әрбір тұрғынының салауатты өмірінің кепілі екенін терең түсінетін шымкенттіктер республикалық экологиялық акцияның жоғары деңгейде өтуіне ықыласпен көңіл бөлуде.

Сурет: Шымкент қаласы әкімдігінің баспасөз қызметі

Шымкент – шырайлы қала. Ал оның сәулеті мен көркін ажарландыра түсуге экологиялық акцияның тигізіп жатқан әсері тіпті зор. Қаланың әрбір көшесі мен аулалары тазалықтың талабына сай жарқырай түсуде.

Жалпы тазалық акциясының белсенділікпен өтуіне Шымкент қаласы әкімдігіне қарасты басқармалар барынша көңіл бөлумен қатар өздері де қызу жұмылуда.

Тазалық — денсаулық кепілі. Ал денсаулық – әр адамның өмірінің байлығы. Осы қағиданы тек науқандық шараға ғана айналдырмай, біздің күнделікті тіршілігіміздің тынысы мен міндеті санай білсек, "Таза Қазақстанның" бейнесі де әрқашан жарық та жарқын болатыны сөзсіз.