Шерзат Полаттың ісі бойынша айыпталушы бұрын неліктен сотталғанын айтып берді

Шерзат Полаттың ісі бойынша сотта бұзақылық пен ұрлық жасады деп айыпталған Азамат Тоқтаубаев бұрын қандай қылмыс үшін сотталғанын айтып берді, деп хабарлайды Zakon.kz.

24 жастағы Азамат Тоқтаубаев үйленген, кәмелетке толмаған балалары бар. Ол Талғар қаласында аспаздың көмекшісі болып жұмыс істеп, шағын бизнеспен де айналысқан.

2025 жылғы 16 мамырда Жетісу облысының қылмыстық істер жөніндегі мамандандырылған ауданаралық сотында өткен кезекті сот процесінде Тоқтаубаев прокурор Дана Сарсенбайдың оның бұрынғы соттылығы туралы сұрақтарына жауап берді.

"Оқиға 2023 жылғы 14 желтоқсанда болды. Адамға шабуыл жасады деген күдікпен іс бойынша жауапқа тартылдым. Бастапқыда екі айға қамауға алынып, тергеу изоляторында болдым. Бірақ қорғаушым менің бұл іске қатысым жоқ екенін дәлелдеді. Сол себепті үйқамаққа ауыстырылдым. 6 ақпанда босатылдым. Алайда Шерзат Полаттың өлімі қоғамда резонанс туғызғандықтан, екі аптадан кейін мені қайта соттады. 2024 жылғы 17 қазанда ҚК 106-бабы 2-бөлімі 7-тармағы бойынша ("Бұзақылық ниетпен қасақана ауыр дене жарақатын келтіру") орташа қауіпсіз колонияға жеті жылға бас бостандығынан айыру туралы үкім шығарылды. Бірақ мен бұл үкімге шағым түсіріп, өз кінәсіздігімді дәлелдеймін", – деді Азамат Токтаубаев.

Азамат Токтаубаев үйқамақта болған кезінде заң бұзып, түнде көңіл көтеру орнына барғанын және кейіннен Шерзат Полаттың өлімі орын алған жерде болғанын мойындады.

"Заң бұзғанымды мойындаймын. Үйден шықпасам, мұндай жағдай болмас еді. Алайда, балам ауырып, дәрі алу үшін түнде дәріханаға бардым. Жолда достарыммен амандасу үшін кафеге соқтым. Бұдан кейін не болғанын түгел айтып берген болатынмын. Дүкенге де тек бауырым үшін барған едім", – деді ол.

Шерзат Полат ісі бойынша айыпталушы өзінің жанында ешқандай қару болмағанын, жанжалға араласпағанын, тек төбелескендерді ажыратуға тырысқанын айтты. Телефон туралы да бұл ұрлық емес екенін, иесін тауып беру үшін ғана алғанын мәлімдеді.

Бұған дейін 2025 жылғы 15 мамырда сотта ағайынды Тоқтаубаевтар – Азамат пен Нұрбол куәлік берді.