Алматының барлық ауданында жаңа жылдық шыршаның шамы бір уақытта жағылды

18 желтоқсанда Алматының барлық ауданында жаңа жылдық шыршаның шамы бір уақытта жағылды, деп хабарлайды Zakon.kz.

Негізгі мерекелік іс-шара Абай алаңында, Республика сарайының алдында өтті. Бұл жерде биіктігі 22 метр болатын қаланың бас шыршасы орнатылды. Жаңа жыл қарсаңындағы салтанатты рәсімге Алматы әкімі Дархан Сатыбалды мен жүздеген қала тұрғыны қатысты.

Бас шыршаны безендіруге 7 шақырымнан астам жаңа жылдық гирляндалар, сондай-ақ жарқын сәндік элементтер, үлкен және кіші шырша ойыншықтары, тақырыптық жаңа жылдық әшекейлер мен жарық кескіндемелері пайдаланылды.

Қала тұрғындары мен қонақтарына заманауи мультимедиялық технологияларды, ауқымды жарық безендіруді және қазақстандық эстраданың танымал орындаушыларының өнерін біріктірген мазмұнды мерекелік бағдарлама ұсынылды.

Қаланың жаңа жылдық бас шыршасының шамын жағу рәсімінің алдында Республика сарайының қасбетінде екі минуттық лазерлік шоу көрсетілді.

Ғимараттың қасбетінде Алматының өзіндік болмысын бейнелейтін ауқымды жарық кескіндемелері көрсетілді. Көрнекі бейнелерде қаланың танымал символдары — таулар, бүркіт бейнесі, сондай-ақ жаңа жылдық элементтер қолданылды. Композицияны жарқын қар ұшқындары, нәзік жарық өрнектері мен динамикалық жарық сәулелері толықтырып, мерекелік әрі салтанатты атмосфера қалыптастырды.

Бағдарламаның тағы бір басты бөлігі, жарық шоуын әсем толықтырған сахналық фейерверк болды, ол мерекелік көңіл күйді одан әрі күшейтті.

Көрермендерге қазақстандық эстрада жұлдыздары, шоу-балет артистері мен мәнерлеп сырғанаушылар орындаған «Кел, Жаңа жыл!» вокалды-хореографиялық композициясы ұсынылды. Сондай-ақ, сахнада Қазақстанның Халық артисі Роза Рымбаева, Әли Оқапов, Мәди Рымбаев, «КешYOU», «Жігіттер», «Astra» топтары, сондай-ақ Балжан Бидаш пен Kodi өнер көрсетті.

Жаңа жылдық шыршалардың шамын жағу салтанатты рәсімдері қаланың барлық сегіз ауданында өтті. Мерекелік алаңдар келесі мекенжайларда орналасқан:

Жетісу ауданы — «Гүлдер» саябағы (Серіков көш., 2А)

Бостандық ауданы — «Атакент» ҚЫІО

Әуезов ауданы — Family Park

Медеу ауданы — 28 гвардияшы-панфиловшылар атындағы саябақ

Алатау ауданы — «Алматы Арена» спорт кешені

Наурызбай ауданы — Шұғыла шағынауданы, 347 (амфитеатр)

Түрксіб ауданы — №6 Оқушылар үйі (Сейфуллин көш., 13/1)

Алмалы ауданы — Абай атындағы ҚазҰТОБ