Пойызда бір күнде бірнеше ұрлық жасаған күдікті ұсталды

Қарағанды базарларының бірінде полицейлер пойызда бірнеше рет жолаушылардың жеке заттарын ұрлаған күдіктіні ұстады, деп хабарлайды Zakon.kz.

ІІМ мәліметінше, күдікті ер адам Көкшетау – Қызылорда пойызында Астанадан Қарағандыға бара жатқан жолда жолаушылардың ұйықтап жатқан сәттерін пайдаланып, үш телефон мен жеке заттары салынған сөмкені ұрлап үлгерген.

"Ұсталған азаматтың осыған ұқсас басқа да ұрлыққа қатысы бар-жоғын анықтау мақсатында жедел-іздестіру шаралары жүргізіліп жатыр". ҚР ІІМ

Ішкі істер министрлігі жол бойында азаматтардың мүлкі мен тыныштығын сақтайтын қарапайым қауіпсіздік шараларын еске салады:

• Мүлікті қараусыз қалдырмау,
• қырағы болу, бағалы заттарыңызды өзіңізбен алып жүру және қауіпсіз жерде ұстау өте маңызды;
• Заттарыңызды бейтаныс адамдарға сеніп қалдырмаңыз;
• Ақшаға құмар ойындарға қатыспаңыз;
• Үлкен көлемдегі қолма-қол ақшаны алып жүрмеңіз, банк қызметін пайдаланыңыз.Әйтпесе, ақшаны бірнеше бөлікке бөліп, сөмкеңіздің әртүрлі жерлеріне жасыру керек;
• Пойызда ұры кез келген адам болуы мүмкін екенін есте ұстаған жөн – жас әйел, қарт адам немесе тіпті жасөспірім;
• Егер пойызда кез келген заң бұзушылыққа тап болсаңыз, бірден жолсерікке және полицияға хабар беріңіз.