Қытайда некені тіркеудегі ережелер жаңартылды

Қытайда неке қию ережелері жеңілдетілді, деп хабарлайды Zakon.kz.

Xinhua News Agency басылымының жазуынша, бұл ел тұрғындарын үйленуге ынталандыру үшін жасалды. Мәселен, жаңа ережелерде құжаттар тізімі оңайлатылған. Енді отбасын құру үшін келесі мәліметтер жеткілікті:

• жеке куәлік;
• қолданыстағы некенің болмауы туралы өтініштер;
• үш ұрпақта жақын туыстық байланыстардың жоқтығы туралы мәлімдемелер.

Бұған дейін жұптар үй шаруашылығын тіркеу кітаптарын алып келуі керек еді. Сонымен қатар, енді некені тіркеу үшін міндетті түрде тұрғылықты мекенжайға барудың қажеті жоқ.

Билік жаңа ережелер уақытты үнемдеп, шаңырақ көтерудегі шығындарды азайтатына сенімді. Себебі, көптеген азаматтар тұрғылықты жерінен тыс аймақта жұмыс істейді және тек некені рәсімдеу үшін өз қалаларына барудан бас тартып жатады.

Сарапшылар отбасы құры санының төмендеуін неке жасындағы халықтың азаюымен, қарым-қатынас туралы көзқарастардың өзгеруімен және отбасын құрудағы шығындардың өсуімен байланыстырды.

Бұған дейін Қытайда некеге тұру деңгейі күрт төмендегені жайлы жазған болатынбыз. Сонымен қатар, жас қыздардың отбасын құрудан неге қашатындығына дәйектер келтірілген.