Қырғызстан құрамасының ойыншысы Ахматалиев төбелескені үшін бес жылға ойыннан шеттетілді

"Мурас Юнайтед" клубының және Қырғызстан құрамасының шабуылшысы Мирбек Ахматалиев украиналық Евгений Терзимен төбелескені үшін футболдан бес жылға шеттетілді. Оқиғаның бастаушысы қазір ұсталып, изоляторға қамалды, ал жәбірленушінің жақ сүйегі сынған, деп хабарлайды Zakon.kz.

Sport Akipress басылымының хабарлауынша, "Мурас Юнайтед" командасының жаттығуы кезінде қырғыз футболшысы құрамадағы украиналық әріптесімен төбелескен.

"Оқиға нәтижесінде клуб легионері Евгений Терзидің жақ сүйегі сынып, зардап шекті. Белгілі болғандай, клубтың ойыншысы Мирбек Ахматалиев оқиғаның бастамашысы болған, онымен клуб еңбек қатынастарын тоқтатуға шешім қабылдады". Қырғыз футбол одағының мәлімдемесі

Қырғызстан футбол комитетінің отырысында кінәліні бес жылға шеттету туралы шешім қабылданды. Ал "Мурас Юнайтед" бүкіл жаттықтырушылар штабы мен спорт директорын жұмыстан шығарды.

Жергілікті БАҚ хабарлағандай, Мирбек Ахматалиев қамауға алынды. Оған КР Қылмыстық кодексінің "денсаулыққа онша ауыр емес зиян келтіру" бабы бойынша айып тағылды.

26 тамызда Қазақстан ұлттық құрамасының бас бапкері Станислав Черчесов қыркүйек айында өтетін Норвегия және Словения құрамаларына қарсы матчтарға шақырылған ойыншыларының нақты тізімін жариялады.