Көп SIM-карталы құрылғы иелеріне 5 жылға дейін жаза қарастырылған: Бас прокуратура ескерту жасады

Қазақстанның Бас прокуратурасы 2026 жылғы 3 қыркүйекте бұдан бір жыл бұрын, яғни 2025 жылғы 30 тамызда Қазақстанда SIM-бокстарды заңсыз айналымға шығаруға заң жүзінде тыйым салынғанын еске салды, деп хабарлайды Zakon.kz.

GSM-шлюздерді Қазақстанға әкелуге, тіркеуге, сатуға және пайдалануға тек байланыс қызметтерін көрсетуге лицензиясы бар байланыс операторларына рұқсат етіледі.

Бас прокуратураның мәліметінше, соған қарамастан кейбір адамдар мұндай құрылғыларды тиісті лицензиясыз заңсыз әкеліп, сатып және пайдаланып жүр. Олардың арасында SIM-бокстарды хабарландыру сайттары арқылы сататын жеке тұлғалар мен телекоммуникациялық жабдықтарды сататын дүкендер бар.

Мысалы, Солтүстік Қазақстан облысында OLX сайтына 4 слотты GSM-шлюзді 120 мың теңгеге сататыны туралы хабарландыру орналастырған адамға қатысты әкімшілік хаттама толтырылды. Қазір оны әкімшілік жауапкершілікке тарту мәселесі қаралып жатыр.

Қадағалау органының түсіндіруінше, SIM-бокстар шетелдік телефон қоңырауларын Қазақстандағы SIM-карталар арқылы өткізуге мүмкіндік береді. Осы арқылы алаяқтар шетелден қоңырау шалып, оны жергілікті нөмірден жасалғандай көрсете алады және қоңыраудың нақты қайдан келгенін жасырады.

"Мұндай құрылғылардың қылмыскерлердің қолына түсуі жаппай алаяқтық қоңыраулар жасауға және адамдардың ақшасын ұрлауға жағдай туғызады. Сондықтан белгіленген тәртіпті бұзып, SIM-бокстарды сатып алмаңыздар және пайдаланбаңыздар", – деп ескертті Бас прокуратура.

Тыйым салынғанға дейін GSM-шлюз сатып алғандар не істеуі керек?

Бас прокуратураның мәліметінше, мұндай құрылғысы бар адамдар оның әрі қарай қалай қолданылатынын анықтау үшін уәкілетті органға жүгінуі қажет.

Сонымен қатар, 2026 жылғы 20 тамыздан бастап Қазақстанда ұялы телефондарды сатуға қатысты жаңа ережелер күшіне енді. Енді верификациядан өтпеген ұялы телефондарды сатуға болмайды. Ал жеке тұлға өзі шетелден алып келген ең көбі екі телефонды жылына бір рет верификациядан өткізе алады.