Қазақстанда жұмыртқа бағасы төмендеді: жыл басынан бері тағы не арзандады

Қазақстанның Сауда және интеграция министрлігі жұмыртқа бағасының тұрақты түрде төмендегенін мәлімдеді, деп хабарлайды Zakon.kz.

ҚР Ұлттық статистика бюросының деректері бойынша биылғы 15 сәуірдегі жағдай бойынша республика бойынша жыл басынан бері ӘМАТ бағасының тұрақты деңгейі сақталып отыр. Бірнеше тауар санаттары бойынша бағаның тұрақты төмендеуі тіркелді.

Ведомство ақпан айында ҚР Сауда және интеграция министрлігі, салалық қауымдастықтар және сауда желілерінің өкілдері арасында меморандумға қол қойылғанын еске салды. Оған сәйкес, С1 санатындағы жұмыртқаның максималды сату бағасы ҚҚС есебімен бір данасына 55 теңгеден аспайтын көлемде белгіленді. Келісім шеңберінде сондай-ақ шекті сауда үстемесінің сақталуы және қосымша үстемеақылардың алынып тасталуы қамтамасыз етіледі.

"Осы шаралардың арқасында сәуір айында жұмыртқа бағасының индексі тұрақты болып қалды, ал соңғы аптаның қорытындысы бойынша (8-15 сәуір аралығында) баға өзгермеді. Мысалы, 2025 жылдың қаңтар айында С1 санатындағы 10 жұмыртқаның орташа бағасы 548 теңгені, ақпанда — 546 теңгені, наурызда — 536 теңгені, ал сәуірде — 531 теңгені құрады", - делінген хабарламада.

Сонымен қатар, арзандаған тауарлар:

• Күріш - жыл басынан бері 4,7% - ға төмендеді,
• Ұн - 1,8%,
• Қарақұмық жармасы - 0,3%.

Сүзбе, күнбағыс майы және рожки сияқты маңызды өнімдердің тұрақты бағасы байқалады — соңғы аптаның қорытындысы бойынша баға индекстері өзгеріссіз қалды немесе 0,1% шамалы ауытқуды көрсетті.