Қазақстан мен Сауд Арабиясы әуе рейстерінің санын айтарлықтай арттырды

Қазақстан мен Сауд Арабиясы әуе рейстерін орындау мүмкіндігін едәуір кеңейтті. Бұл туралы бүгін ҚР Көлік министрлігінің баспасөз қызметі мәлімдеді, деп хабарлайды Zakon.kz.

Ведомствоның хабарлауынша, 2026 жылғы 26 тамызда Эр-Риядта Қазақстан үкіметі мен Сауд Арабиясы Корольдігі үкіметі арасындағы әуе қатынасы туралы келісімге қол қою рәсімі өтті.

"Құжатқа қол қою азаматтық авиация саласындағы қолданыстағы нормативтік-құқықтық базаны нығайтып, екі ел арасындағы тұрақты әуе қатынасын дамытуға қосымша мүмкіндік берді. Қол жеткізілген уағдаластық аясында тараптар тұрақты рейстердің рұқсат етілген санын аптасына 28-ден 70-ке дейін арттырды", – деп хабарлады ҚР Көлік министрлігінің баспасөз қызметі бүгін, 27 тамызда.

Ведомство қол жеткізілген уағдаластықтар негізінде әуе тасымалдаушылары Астана мен Эр-Рияд арасында тікелей тұрақты рейстер ашуды, сондай-ақ Сауд Арабиясының басқа қалаларына қатынайтын бағыттар санын көбейтуді жоспарлап отырғанын нақтылады.

Келісімге қол қою рәсіміне ҚР көлік вице-министрі Талғат Ластаев және Сауд Арабиясы Корольдігінің Азаматтық авиация бас басқармасы президентінің міндетін атқарушы Сүлейман бен Ахмед әл-Бассам қатысты.

2026 жылғы 21 тамызда Алматы мен Гонконг арасында жаңа тікелей әуе рейсі ашылатыны белгілі болды.