Қасым-Жомарт Тоқаев сегіз елдің елшісінен сенім грамоталарын қабылдады

2026 жылдың 18 қыркүйегінде Астанадағы Тәуелсіздік сарайында сегіз мемлекеттің төтенше және өкілетті елшілерінің президент Қасым-Жомарт Тоқаевқа сенім грамоталарын тапсыру рәсімі өтті, деп хабарлайды Zakon.kz.

Мемлекет басшысына сенім грамоталарын:

• Мысыр Араб Республикасының елшісі Самех Шехата;
• Швейцария Конфедерациясының елшісі Кристина Хонеггер-Золотухин;
• Эстония Республикасының елшісі Марье Лууп;
• Оман Сұлтандығының елшісі Салах Джабуб;
• Мажарстан елшісі Ференц Цомбош;
• Гвинея-Бисау Республикасының елшісі Браима Эмбало;
• Нигерия Федеративтік Республикасының елшісі Джозеф Олусола Иджи;
• Дания Корольдігінің елшісі Ларс Туесен табыстады.

Президент елшілерге құрмет білдіріп, Қазақстанның сыртқы саясатта бейбіт әрі сындарлы бағыт ұстанатынын атап өтті.

"Бүгін – елдеріңіздің өкілі ретінде сіздер үшін де, Қазақстан Республикасы үшін де аса маңызды күн. Осы орайда бәріміз бірлесе жұмыс істеуіміз қажет екеніне сенімдімін. Қазақстан – бейбітсүйгіш ел. Біз теңгерімді әрі сындарлы сыртқы саясат ұстанамыз. Ел ішінде реформалар жүргізуге қолайлы жағдай жасауға ұмтыламыз. Сыртқы істер министрлігінің, мемлекеттік органдардың, сондай-ақ Президент резиденциясының есігі сіздер үшін әрдайым ашық. Өйткені қазіргі тұрақсыз әрі құбылмалы әлемде бірге болуға тиіспіз", – деді Қасым-Жомарт Тоқаев.