Қарағанды облысында дала өртінен зардап шеккендерге өтемақы төлеу уәде етілді

Қарқаралы ауданының шаруа қожалықтарын ауыл шаруашылығы басқармасының басшысы Саят Мусин аралады. Ол дала өртінің салдарын анықтау үшін шаруа қожалықтарының басшыларымен кездесті, деп хабарлайды Zakon.kz.

Алдын ала мәліметтер бойынша өрт 35 мың гектарға тараған.

Теректі ауылында бір қыстақ зардап шекті. Шамамен 300 тонна шөп өртенді. Залал толығымен өтеледі.

"Теректі ауылындағы қыстақтардың бірінде 300 тонна шөп өртенді. Қалған қыстақтарда шөптің өртенуі, мал шығыны тіркелген жоқ. Барлық қажетті көмек көрсетіледі", – деді Саят Мусин.

Қарағанды облысы әкімінің орынбасары Ораз Тәуірбеков, Қарқаралы ауданының басшысы Әділжан Арғыновтың басшылығымен өткен штаб отырысында өрттің салдарын жою үшін қабылданатын шаралар талқыланды.

Ораз Тәуірбеков жиналған фермерлерге облыс әкімінің тапсырмасы бойынша көмек көрсетілетінін, ол үшін арнайы комиссия құрылатынын айтты.

6 қазанда Қарағанды облысы Қарқаралы ауданы Қоянды ауылының маңында құрғақ шөп өртенді. Кейін өрт Павлодар облысына тарап, Баянауыл ұлттық паркінің ормансыз аумағын қамтыды: кейіннен дала өртін оқшаулауға мүмкіндік туды.

7 қазанда ТЖМ Қарқаралы ауданында өртті сөндіру кезінде 24-ӨСБ аға өрт сөндіруші-құтқарушысы Хайрат Хали қаза тапқанын, тағы төрт адам зардап шеккенін хабарлады.