Канадада шорт-тректен Әлем кубогінің жаңа маусымы басталады: ел намысын кімдер қорғайды

Бүгін Канаданың Монреаль қаласында шорт-тректен Әлем кубогінің жаңа маусымы басталады. Халықаралық конькимен жүгірушілер одағының (ISU) шешімі бойынша, биылдан бастап байрақты бәсеке World Tour деген атаумен және жаңа форматпен ұйымдастырылады.

Жарысқа қатысушы мемлекеттер енді ел атымен емес, командалық атаумен өнер көрсетеді. Сондай-ақ әр команданың өз тотемі болады. Ұйымдастырушылар мұндай өзгерісті көрермендердің қызығушылығын арттыру мақсатында жасап отыр. Қазақстан ұлттық құрамасының спортшылары енді Әлем кубогі кезеңдерінде Kazakh Nomads деген атаумен сынға түседі.

Жаңа ереже бойынша енді әлемдік жарыстарда 17 жастан асқан спортшылар ғана өнер көрсете алады.

Канададағы Әлем кубогінің алғашқы кезеңіне Қазақстан ұлттық құрамасы сапынан мына спортшылар қатысады:

Ерлер: Абзал Әжіғалиев, Денис Никиша, Әділ Ғалиахметов, Еркебұлан Шамұханов, Айбек Нәсен, Глеб Ивченко, Мерсаид Жақсыбаев;

Әйелдер: Яна Хан, Мадина Жанбусинова, Ольга Тихонова, Малика Ермек, Алина Әжіғалиева және Зейнеп Құмархан.

Айта кетейік, World Tour жарысына Қазақстан құрамасынан бөлек, Канада (Canadian Ice Maples), Қытай (Chinese Loongs), АҚШ (USA Eagles), Оңтүстік Корея (Korean White Tigers), Жапония (Japanese Ninjas), Бельгия (Belgian Ice Bears), Италия (Italian Gladiators) және Нидерланд (Dutch Lions) спортшылары қатысады.Шорт-тректен Әлем кубогінің алғашқы кезеңі 25-27 қазан күндері Монреальда өтеді. Екінші кезеңді 1-3 қараша күндері АҚШ-тың Солт-Лейк-Сити қаласы қабылдайды.