ІІМ қазақстандықтардың дербес деректері сатылымға шығарылды деген ақпаратты тексеріп жатыр

Қазақстандықтардың дербес деректері сатылымға шығарылды деген ақпаратқа Ішкі істер министрлігі түсініктеме берді, деп хабарлайды Zakon.kz.

Ведомство мәліметінше, қазіргі уақытта eGov порталына заңсыз кіру немесе рұқсатсыз қол жеткізу деректері тіркелмеген.

Соған қарамастан, дербес деректерді сату туралы хабарландырудың жариялануы назардан тыс қалмаған. Қазір оны орналастырған адамның жеке басын, ұсынылған деректердің қайдан алынғанын, сондай-ақ оларды заңсыз иемденуге және таратуға қатысы бар өзге де тұлғаларды анықтау шаралары жүргізіліп жатыр.

ІІМ азаматтардың дербес деректерін қорғауға қатысты конституциялық кепілдіктердің сақталуына ерекше мән беретінін атап өтті.

"Барлық қатысы бар тұлғаны анықтау үшін қажетті шаралар қабылданады. Ешкім жауапкершіліктен жалтара алмайды", – делінген хабарламада.

Аталған мәселе Ішкі істер министрлігінің ерекше бақылауына алынды.