Әжесінің 100 мың теңгесін жұмсап қойған қыз тонау оқиғасын ойлап тапты

Әжесінің 100 мың теңгесін жұмсап қойған қыз іс-әрекетін жасыру үшін өзін тонап кеткендігі туралы оқиғаны ойлап тапқан.

20 жастағы павлодарлық қыз полицияға қоңырау шалып, өзін тонап кеткені туралы хабарлады. Оператордың сұрақтарына жылап тұрып жауап берген ол, оқиғаны шеберлікпен суреттеп, шынайы образға енген.

"Менің сөмкемді ұрлап кетті! Ішінде 100 500 теңге және көк түсті Samsung телефоны болған. Автобустан түсіп жатқанымда, артымнан бір ер адам келіп, сөмкемді жұлып алып қашып кетті. Мен оның артынан жүгірдім, бірақ қуып жете алмадым. Ол бірден жоқ болып кетті", – деді телефонның ар жағынан өксігін баса алмаған "жәбірленуші".

Жедел-тергеу тобы дереу оқиға орнына аттанып, қыз көрсеткен мекенжайға жетті. Полиция қызметкерлері, автопатрульдер мен учаскелік инспекторлар жақын маңдағы көшелерді тексеріп, күдіктіге ұқсас азаматтарды іздестірді. Бейнебақылау камералары тексерілді, бірақ оқиға камераға түспеген.

Қыздың бұрын ер адамды аулада көргенін айтып, артынан жүгіргенін баяндаған мәлімдемелері күдік тудырды. Тергеушіге күмән тудырған тағы бір жайт – қыздың қылмыскердің қашқан бағытын нақты айта алмай, біресе бір жақты, біресе екінші жақты көрсеткені. Жәбірленуші полиция бөліміне жеткізілген соң, күдік расталды.

"Арнайы қызметтерді көрінеу жалған шақырғаны үшін" қыз әкімшілік жауапкершілікке тартылып, 30 айлық есептік көрсеткіш (АЕК) көлемінде айыппұл салынды.

Павлодар облысы полиция департаментінің баспасөз қызметі бұл жағдайдың маңыздылығын атап өтті: "Мұндай әрекеттер тек полиция жұмысына кедергі келтіріп қана қоймай, шынайы қауіп-қатер туындаған кезде қызмет көрсету уақытын ұзартып, басқа азаматтардың өміріне қауіп төндіруі мүмкін. Жедел қызметтер мен полиция нақты қауіптерге қолжетімді болуы тиіс.