Елімізде су тасқыны қаупі бар елді мекендер саны 1 200-ден асады

ҚР ТЖМ Төтенше жағдайлардың алдын алу комитеті төрағасының міндетін атқарушы Әсет Жылқайдаровтың айтуынша, қазір ел бойынша су тасқыны қаупі бар елді мекендер саны 1 223 болды, деп хабарлайды Zakon.kz.

Әсет Жылқайдаровтың мәліметінше, бұл елді мекендерді тасқын судан қорғау үшін 576 шақырым қорғаныш бөгендері мен біліктері тұрғызылды.

"822 шақырым дренаж жүйелері, каналдар мен арықтар жөнделіп, салынды. Автомобиль мен темір жол қатынастарында 960 су өткізу құрылысы орнатылып, ауыстырылды. 74 өзеннің қауіпті учаскелерінде 500 шақырымға жуық түбін тереңдету, жағалауды нығайту және арналарды тазарту жұмыстары жүргізілді", - деді ол.

ТЖМ өкілінің айтуынша, зардап шеккендерді қабылдаудың 3,5 мыңнан астам пункті дайындалды, броньнан шығарылған жағдайда тіршілікті қамтамасыз ету құралдары мен мемлекеттік материалдық резерв техникасы айқындалды.