Дәрі-дәрмектерді сараптау ұлттық орталығы директорының аяғына «тұсау-браслет» тағылды

16:43, 28 қыркүйек 2020
72

Нұр-Сұлтан қаласындағы Сыбайлас жемқорлыққа қарсы қызмет департаменті Дәрі-дәрмектерді сараптау ұлттық орталығының директоры Ерік Байжүнісовке қатысты сотқа дейінгі тергеу жүргізіп жатыр, деп хабарлайды zakon.kz.

ҚР Денсаулық сақтау министрлігінің "Дәрі-дәрмектерді сараптау ұлттық орталығы" РМК-нің бас директоры Е.Байжүнісовке қатысты бірнеше мәрте пара алу күдігіне байланысты "үйқамаққа алу" түрінде профилактикалық шара таңдалып, жаңа технология - электронды бақылау құралы (браслет) қолданылды, - делінген ресми сауалға елорданың сыбайлас жемқорлыққа қарсы қызметінің берген жауабында.

Қазіргі уақытта істің мән-жайларын анықтау үшін жан-жақты, толыққанды және объективті бағытта тергеу әрекеттері жүргізіліп жатыр. Басқа ақпараттар тергеу мүддесіне сай жария етілмейтіні де айтылды. Істің соңғы шешімін сот шығарады.

Ерік Байжүнісов Дәрі-дәрмектерді сараптау ұлттық орталығын 2020 жылдың 4 тамызынан бастап басқарады.

21 қыркүйекте Сыбайлас жемқорлыққа қарсы қызмет сыбайлас жемқорлық күдігіне ілінгені үшін электронды қадағалау құралдары - "тұсау браслеттерді" тағу тәжірибесі енгізілгенін хабарлады. Ол бұлтартпау шаралары таңдалған тұлғаға тағылатыны да айтылды. Биылғы жылдың 17 қыркүйегінде бұл тәжірибе алғаш рет Қарағандыда қолданылды.


Источник: zakon.kz


Подписывайтесь на наш Telegram-канал. Будьте в курсе всех событий!
Мы работаем для Вас!

Пікір