Артық және қате төлемдерді қайтару ережелері өзгерді

Еңбек және халықты әлеуметтік қорғау министрлігі 2026 жылғы 2 сәуірдегі бұйрықпен артық немесе қате төленген әлеуметтік аударымдар мен өсімпұлды қайтару қағидаларына өзгерістер енгізді, деп хабарлайды Zakon.kz.

Атап айтқанда, мемлекеттік қызметті алу үшін өтініш беруші белгіленген үлгі бойынша өтініш тапсырады:

• қағаз түрінде – Мемлекеттік корпорация арқылы;
• электронды түрде – веб-портал арқылы.

Өтінішке мынадай құжаттар қоса беріледі:

• міндетті әлеуметтік сақтандыру жүйесіне қатысушының еңбек қызметінің басталғанын немесе тоқтатылғанын растайтын құжаттың көшірмесі;
• шағын бизнес субъектілері үшін оңайлатылған декларацияның көшірмесі (910.00 нысаны).

Егер декларация болмаса, оның орнына мемлекеттік кірістер органдары берген салық төлеушінің жеке шотынан үзінді көшірме ұсынуға болады.

Сондай-ақ жиынтық төлем тапсырмасын толтыру талаптары жаңартылды.

Енді әрбір қатысушы бойынша міндетті түрде мыналар көрсетілуі тиіс:

• аты-жөні;
• ЖСН;
• әлеуметтік аударым сомасы;
• төлем кезеңі (айы мен жылы).

Егер құжат қағаз түрінде рәсімделсе, төлем кезеңі қосымша "Төлем мақсаты" бағанында көрсетілуі қажет.

Бұл бұйрық 2026 жылғы 18 сәуірден бастап күшіне енеді.