Алматылық офтальмологтар көзіне металл кіріп кеткен ер адамның жанарын сақтап қалды

23:44, 28 наурыз 2023

© Сурет: ОҚКА баспасөз қызметі

Жуырда Орталық қалалық клиникалық аурухана дәрігерлері көзге жоғары технологиялық ота жасады, деп хабарлайды Zakon.kz.

Орталық қалалық клиникалық аурухана офтальмологы Гүлзат Әбдірайымованың айтуынша, биыл офтальмология бөлімшесінде 450-ге жуық ота жасалған.

"62 жастағы ер азаматтың көзіне металл сынығы түскен. Көлігін жөндеп жатқанда оң көзіне металл сынығы түсіп, шұғыл түрде ауруханаға жеткізілді. Металл сынығы көздің барлық қабатынан өтіп, көз орбитасының ішіне, жанардың жүйке тамырлары орналасқан тұсына қадалған. Ота барысында металл алынып, жарақаттың салдарынан болатын менингит пен сепсистің алдын алдық". Офтальмология бөлімшесі меңгерушісі Гүлзат Әбдірайымова

Жоғары технологиялар мен білікті мамандар пациенттің көз жанарын сақтап қалды.

"Күрделі ота 3 сағатта аяқталды. Жалпы, мұндай ота асқан шеберлікті, зергерге тән дәлдікті талап етеді. Өйткені операция барысында көздегі шыныәйнектің пішініне титтей де зақым келмеуге тиіс". Офтальмолог Гүлзат Әбдірайымова

Қазір науқастың жағдайы жақсы, көру қабілеті қалпына келген, бірақ ол алдағы уақытта көз дәрігерлерінің бақылауында болуға тиіс.