Алматыда марихуана өсіретін фитозертхана анықталды

Есірткі қылмысына қарсы күрес басқармасы жүргізген жедел-іздестіру іс-шараларының нәтижесінде, Бостандық ауданындағы көпқабатты үйдегі пәтерлердің бірінен есірткі зертханасы анықталды.

Ғимаратта тыйым салынған өсімдіктер – марихуана өсірілген. Тексеру барысында 17 түп қарасора, шамамен 400 грамм дайын марихуана, оралған байламдар, электронды таразылар мен заңсыз қызметте пайдаланылған болуы мүмкін ұялы телефон тәркіленді.

"Мұндай зертханалар аса қауіпті. Біз мұндай қылмыстық топтардың әрекетін жүйелі түрде жолын кесеміз және заң аясында есірткі қылмысымен күресуді жалғастырамыз. Аталған дерек бойынша қылмыстық іс қозғалды. Тергеу жалғасуда", – деді, Алматы қалалық ПД есірткі қылмысына қарсы күрес басқармасының бастығы Мұрат Жұмабай.

Алматы полициясы, азаматтарды есірткінің заңсыз айналымына қатысты кез келген күдікті деректер туралы хабарлауға шақырады.