Алматыда BMW жүргізушісі жол ережесін 66 рет өрескел бұзып, 2,4 млн теңге айыппұл жинаған

Алматыда Жол қозғалысы ережесін ең көп өрескел бұзған тұрғын анықталды. Ол BMW көлігінің жүргізушісі болып шықты, деп хабарлайды Zakon.kz.

Оңтүстік астана прокуратурасы 2026 жылғы 25 тамызда оқиғаның мән-жайын жариялады:

"Қала прокуратурасы BMW маркалы көлікті анықтады. Оның жүргізушісі жыл басынан бері ЖҚЕ-ні 66 рет өрескел бұзып, 2,4 млн теңгеден астам айыппұл арқалаған. Оның 58-і жылдамдық режимін бұзу фактісі", – делінген хабарламада.

Жүргізушіге қатысты әкімшілік хаттамалар толтырылып, салынған айыппұлдар сол жерде төленген.

Қадағалау органының мәліметінше, соңғы тәулікте Алматы аумағында ЖҚЕ-ні бұзудың 1699 фактісі анықталған. Оның ішінде жол қозғалысына қатысушылардың өмірі мен денсаулығына жоғары қауіп төндіретін 230 өрескел құқық бұзушылық бар.

Анықталған құқық бұзушылықтардың қатарында:

• көлікті мас күйінде басқару – 13 факт;
• көлік басқару құқығынан айырылған адамның көлік жүргізуі – 1 факт;
• жалған мемлекеттік тіркеу нөмірлерімен көлік жүргізу – 2 факт;
• маневр жасау ережелерін, соның ішінде қауіпті маневр жасауды ("шашка") бұзу – 103 факт;
• қауіпсіздік белдігін тақпау – 71 факт;
• қарсы қозғалыс жолағына шығу – 9 факт;
• көлік жүргізу кезінде ұялы телефон пайдалану – 31 факт.

Бұдан бөлек, 20 көлік арнайы тұраққа қойылды.