Ақмола облысында отбасы қатігездікпен өлтірілді: күдікті ұсталды

Әлеуметтік желіде Астана маңында отбасының қатігездікпен өлтірілгені туралы хабар тарады. Бұл хабарға Ақмола облысы полиция департаментінің баспасөз қызметі жауап берді, деп хабарлайды Zakon.kz.

Таралымда ер адамның анасын, әкесін және кішкентай қарындасын өлтіргені айтылған. Сондай-ақ, олардың мәйіттері бөлшектеліп, үй ауласында шашылған деп көрсетілген.

"Жібек Жолы ауылында болған кісі өлтіру фактісі бойынша мессенджерлер мен әлеуметтік желілерде түрлі қауесет пен жалған ақпарат таралуда. Осы факті бойынша қылмыстық іс қозғалды. Күдікті оқиға орнында ұсталып, уақытша ұстау изоляторына жеткізілді. Тергеудің барысы полиция департаментінің басшылығының бақылауында. Басқа ақпарат тек тергеу мүддесінде жарияланбайды", – деп хабарлады Ақмола облысы полиция департаментінің баспасөз қызметі 2026 жылғы 2 наурызда.

Полиция азаматтарды тек ресми ақпарат көздеріне сенуге және тексерілмеген деректерді таратпауға шақырады.

"Қасақана жалған ақпарат таратқаны үшін Қазақстан Республикасының заңнамасына сәйкес жауапкершілік қарастырылған", – деп ескертті департамент қызметкерлері.

Жібек Жолы – Ақмола облысы, Аршалы ауданындағы ауылы. Астанадан шамамен 26 км қашықтықта орналасқан.

Еске сала кетейік, 2026 жылғы 27 ақпанда Қазақстан ІІМ Атырау облысының тұрғындарын Индонезияда туыстарын өлтірді деген күдікпен ұстаған видеоны көрсеткен болатын.