Мамин: 2020 жылы 430 мың жаңа жұмыс орны құрылады

Алматы. 24 қаңтар. 7kun.kz — 2020 жылы экономиканың барлық саласында 430 мың жаңа жұмыс орны ашылады. Бұл туралы Мемлекет басшысының төрағалығымен өткен Үкіметтің кеңейтілген отырысында Асқар Мамин айтты.

«2020 жылы экономиканың барлық саласында 430 мың жаңа жұмыс орны, оның ішінде өнімділігі жоғары жұмыс орындары құрылады… Негізгі көздер қызмет көрсету саласы болады, бірінші кезекте туризм, сауда және құрылыс, сондай-ақ нақты сектор салалары, соның ішінде өңдеу өнеркәсібі мен АӨК», — деп атап өтті премьер-министр.

Сонымен қатар, үкімет басшысы экономиканың түрлі салаларындағы 2 мың басым жоба туралы деректерді ұсынды.

Маминнің мәлімдеуінше, елге инвестиция тарту үшін өңдеуші өнеркәсіп, отын-энергетикалық және агроөнеркәсіптік кешендер, туризм, денсаулық сақтау, көлік және логистика және т.б. әлеуетке ие.

«Инвестициялық қызметті жандандыру үшін министрлер кабинеті 44 трлн теңге сомасына 2 мыңнан астам жобаның пулын қалыптастырды. Осы салалардың әрқайсысы үшін инвестиция тарту бойынша нақты мақсатты индикаторлар белгіленді», – деді Үкімет басшысы.

Сондай-ақ, ол инвестицияларды тарту жөніндегі үйлестіру кеңесі аясында инвестициялық жобаларды іске асыру және елдегі бизнес-ахуалды жетілдіру мәселелері жүйелі түрде шешіледі деп сендірді.

Үкімет жұмысының маңызды басымдықтарының бірі — өнімді жұмыс орындарын құру. Премьер-министрдің айтуынша, оған тауарлар мен қызметтер өндірісін ұйымдастырудың жаңа технологиялық деңгейіне көшуді көздейтін инвестициялық жобаларды іске асыру ықпал етеді.

«Бұл еңбек өнімділігінің бір адамға 8,2 млн теңгеге дейін өсуіне әкеледі (2019 жылы – бір адамға 7,4 млн теңге)», – деді Үкімет басшысы.

Источник: 7kun.kz