28 сәуірдегі сауда барысында доллар бағамы төмендеуін жалғастырды

Қазақстан қор биржасында (KASE) 2025 жылғы 28 сәуірде сағат 15:30-да шетел валюталарымен күндізгі сауда-саттық жабылды, деп хабарлайды Zakon.kz.

Сауда-саттықтың қорытындысы бойынша доллардың орташа сараланған бағамы тағы 1,3 теңгеге төмендеп, 513,68 теңге болды.

Ресей рублінің орташа сараланған бағамы 6,22 теңгеге дейін өсті (+0,01).

Таңғы саудада юаньның орташа сараланған бағамы 70,45 теңге (-0,29) болды.

Ақша айырбастау орындарында доллар 513,1-515,5 теңге, еуро 583-587,5 теңге, рубль 6,05-6,17 теңге аралығында сатылуда.

28 сәуірдегі сауда барысында әлемдік мұнай бағасы төмендеді.

Осылайша, ICE Futures электрондық саудасында Brent маркалы шілдедегі фьючерстерінің құны 0,08%-ға арзандап, барреліне $65,75 құрады.

NYMEX электрондық саудасында WTI мұнайының маусым айындағы фьючерстері 0,03%-ға арзандап, барреліне 63 долларды құрады.

Таңертең Ұлттық банк доллар бағамын 515,03 теңге, еуроны 584,82 теңге, рубльді 6,24 теңге деп белгіледі.