WTA Елена Рыбакинаны жылдың үздік теннисшісі атағына үміткерлер қатарына қосты
© Сурет: ktf.kz
Әйелдер теннисі қауымдастығы (WTA) 2026 жылғы маусым қорытындысы бойынша жыл сайынғы WTA Player Awards сыйлығының үміткерлерін жариялады. Жылдың үздік теннисшісі атағына үміткерлер арасында Қазақстан өкілі Елена Рыбакина да бар, деп хабарлайды Zakon.kz.
Басты жеке марапатқа Рыбакинамен бірге Беларусь өкілі Арина Соболенко, ресейлік Мирра Андреева, чехиялық Линда Носкова және украиналық Элина Свитолина таласады.
WTA-ның ресми сайтында хабарланғандай, Рыбакина биыл мансабындағы ең табысты маусымдардың бірін өткізді. 2026 жылы ол алты турнирдің финалына шығып, төрт рет чемпион атанды. Оның екеуі "Үлкен дулыға" санатындағы Australian Open және US Open турнирлеріндегі жеңістер болды. Қазақстандық теннисші екі финалда да сол кезде әлемдік рейтингтің көшін бастаған Арина Соболенкодан басым түсті.
Сонымен қатар Рыбакина Штутгарт пен Нинбо қалаларындағы турнирлерде жеңіске жетіп, Индиан-Уэллс пен Торонтода өткен WTA 1000 санатындағы жарыстардың финалына шықты.
US Open турниріндегі жеңісінен кейін теннисші мансабында алғаш рет әлемдік рейтингтің бірінші сатысына көтерілді. Ол маусымды да WTA рейтингінің көшбасшысы ретінде аяқтады.
Қауымдастық Рыбакинаның қатты төсенішті корттардағы нәтижесін де ерекше атап өтті. Бұл маусымда ол 41 рет жеңіске жетіп, 438 эйс орындады. Бұл көрсеткіштер бойынша ол барлық теннисшіден озып түсті.
Қазақстан тағы бір номинацияда да ұсынылды. Анна Данилина сербиялық Александра Круничпен бірге жылдың үздік жұбы атағына үміткер атанды. 2026 жылы бұл дуэт Дохада өткен WTA 1000 санатындағы турнирде жеңіске жетіп, Australian Open, Индиан-Уэллс және Roland Garros жарыстарының финалына шықты.
Жалпы, WTA бес аталым бойынша үміткерлерді жариялады. Олар: жылдың үздік теннисшісі, жылдың үздік жұбы, жыл серпілісі, жылдың үздік жаңа ойыншысы және үздік оралу.
Жеңімпаздарды бұқаралық ақпарат құралдарының өкілдері анықтайды. Нәтижелер 2026 жылғы 14 желтоқсаннан кейін белгілі болады.
Источник: zakon.kz
Подписывайтесь на наш Telegram-канал. Будьте в курсе всех событий!
Мы работаем для Вас!
Тағы да оқыңыздар:
-
20:53, 20 қараша 2026
Мәнерлеп сырғанаушы Артур Смағұлов Эстониядағы турнирдегі өнерін аяқтады
-
20:04, 20 қараша 2026
Сенбіде елдің бірнеше өңірінде тұман түсіп, көктайғақ болады
-
19:52, 20 қараша 2026
Димашқа Мексикада Мұхаммед Әли мен Тайсон иеленген белбеу берілді
-
19:49, 20 қараша 2026
Нәлібаев Түркістан облысындағы ірі энергетикалық нысанды уақтылы пайдалануға беруді тапсырды
-
19:32, 20 қараша 2026
Тоқаев ҰҚК төрағасы Марат Ирменовті қабылдады





